Гэта было ўжо 13-е галасаваньне за ваеннае становішча пасьля пачатку поўнамаштабнага ўварваньня расейскай арміі ва Ўкраіну, адзначыў дэпутат ад партыі «Голас» Яраслаў Жалязьняк.
Да гэтага трохмесячны тэрмін працягваўся да 9 лістапада. У пэрыяд асаблівага рэжыму могуць часова абмяжоўвацца асобныя правы і свабоды грамадзян, гарантаваныя Канстытуцыяй, адзначае «РБК-Украіна».
Выданьне таксама нагадвае, што ўпершыню ваеннае становішча ва Ўкраіне было ўведзена ў дзень пачатку поўнамаштабнага ўварваньня арміі РФ 24 лютага 2022 году. У той жа дзень Дзяржаўная памежная служба заявіла пра абмежаваньні на выезд для мужчын ва ўзросьце ад 18 да 60 гадоў.
Мінабароны Расеі заявіла аб узяцьці гораду Сялідава
Міністэрства абароны Расеі ў аўторак заявіла, што расейскія войскі ўзялі горад Сялідава ў Данецкай вобласьці Ўкраіны. Гэта горад на поўдзень ад Пакроўску на захадзе вобласьці з даваенным насельніцтвам каля 25 тысяч чалавек.
Генштаб УСУ пакуль не пацьвярджаў страту гораду, аднак шматлікія крыніцы, як расейскія, так і ўкраінскія, паведамлялі ў апошні тыдзень аб прарыве расейскіх вайскоўцаў у яго цэнтральныя кварталы і адступленьні ўкраінскіх сіл на ўскраіны. Публікаваліся фота і відэа з расейскімі салдатамі і сьцягамі ў горадзе.
Сялідава — найбуйнейшы пасьля ўзятай зімой Аўдзееўкі населены пункт, пра ўзяцьце якога афіцыйна заявіла Міністэрства абароны Расеі.
Паводле паведамленьняў, расейскія войскі працягваюць наступ на поўдзень ад Сялідава, у напрамку гораду Курахава. Другі ўдар у напрамку Курахава наносіцца з поўдня, з боку нядаўна захопленага Вуглядару.
У аўторак у Міністэрстве абароны Расеі заявілі, што расейскія войскі занялі населеныя пункты Кацярынаўка і Дабравольле на гэтым напрамку, а таксама пасёлак Гарняк на поўнач ад Курахава. Украінскія крыніцы, у прыватнасьці праект DeepState, паведамлялі пра баі там у апошнія дні. Шэраг расейскіх каналаў паведамляе і пра глыбейшы прарыў расейскіх войскаў на паўднёвым флянгу, незалежных пацьверджаньняў гэтых заяваў пакуль няма.
Аналітыкі адзначаюць, што тэмпы прасоўваньня расейскіх войскаў у Данецкай вобласьці апошнім часам паскорыліся. Нямецкая газэта Zeit у аўторак піша, што ім за кастрычнік удалося ўзяць пад кантроль 478 квадратных кілямэтраў украінскай тэрыторыі. Гэта самая вялікая колькасьць з сакавіка 2022 году — другога месяца расейскага шырокамаштабнага ўварваньня. Толькі за апошні тыдзень расейскія вайскоўцы занялі амаль 200 квадратных кілямэтраў украінскай тэрыторыі.
Пры гэтым украінскія вайскоўцы працягваюць кантраляваць частку тэрыторыі Расеі ў Курскай вобласьці. Расейскі наступ там у апошнія тыдні зноў застопарыўся. Украінскія войскі ўтрымліваюць раённы цэнтар Суджу і шэраг прылеглых населеных пунктаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум