Расейскія войскі ў ноч на 29 кастрычніка атакавалі мірныя гарады Ўкраіны баявой авіяцыяй, артылерыяй і дронамі. Найбольш пацярпелі Харкаў, Крывы Рог і Кіеў.
У Маскве заявілі аб зьнішчэньні 7 украінскіх бесьпілётнікаў — па 2 над Бранскай і Курскай абласьцямі і аднаго — над акваторыяй Чорнага мора. Аб наступствах падзеньня дронаў у Міністэрстве абароны Расеі не паведамілі.
Ва Ўкраіне пацярпелі дзясяткі людзей
У Харкаве ў выніку расейскага авіяўдару загінулі чатыры і атрымалі раненьні сем чалавек. Як паведаміў мэр горада Ігар Церахаў, расейцы ўдарылі ў прыватны сэктар: чатыры дамы зьнішчаныя цалкам, яшчэ 19 пашкоджаныя.
«Апошнія дні вораг сканцэнтраваўся менавіта на тэрарыстычных ударах па Харкаве — б’е па жылых дамах, па нашых гістарычных помніках, па сымбалях горада, такіх як „Дзяржпрам“», — паведаміў Ігар Церахаў.
«Дзяржпрам» — Дом дзяржаўнай прамысловасьці, адзін зь першых савецкіх хмарачосаў (13 паверхаў), пабудаваны ў 1925-1928 гадах на самай вялікаай плошчы Харкава. «Дзяржпрам» не пацярпеў у часе другой усясьветнай вайны, у 2017 годзе яго прызналі помнікам UNESCO.
Ігар Церахаў паведаміў, што расейцы атакавалі Харкаў ракетай-гібрыдам «Гром-Е1» — гэта адна з найноўшых распрацовак Расеі, якую называюць аналягам амэрыканскіх ракет JDAM-ER.
Па Крывым Рогу расейцы нанесьлі ракетны ўдар. Пацярпеў жылы квартал зь вельмі шчыльнай шматкватэрнай забудовай. Удалося выратаваць пяць чалавек, 14 пацярпелі. У лякарні памёр 39-гадовы мужчына ў выніку атрыманьня траўмы галавы, стан яшчэ аднаго пацярпелага застаецца цяжкім.
У выніку ўдару амаль цалкам зруйнавалі трохпавярховы дом, яшчэ больш за 20 — пашкоджаныя. Перабіты газаправод, пашкоджана больш за 20 жылых дамоў, мэдычная ўстанова, школа, гаражы, аб’екты бізнэсу.
У Кіеве паветраную трывогу абвяшчалі двойчы, яна працягвалася больш за чатыры гадзіны. Украінскую сталіцы расейцы атакавалі дронамі. Прыцэльныя ўдары наносяць па Саломянскім і Сьвятошынскім раёнах Кіева. Пацярпелі 6 чалавек, аднаго зь іх шпіталізавалі.
Паводле мэра Кіева Віталя Клічко, у выніку падзеньня дрону загарэўся жылы дом, гандлёвы цэнтар і некалькі аўтамабіляў.
У Расеі аб маштабах зьбіцьця дронаў не паведамляюць.
На фронце адбылося 149 баявых сутыкненьняў
У Генэральным штабе Ўзброеных сіл Украіны паведамілі, што за апошнія содні на ўсіх кірунках фронту адбылося 149 баявых сутыкненьняў. Найбольш — на курахаўскім кірунку ў Данецкай вобласьці.
Расейцы атакавалі пазыцыі ўкраінскіх вайскоўцаў ракетамі, кіраванымі авіябомбамі і з артылерыі.
Паводле ўкраінскага Генштабу, Расея працягвае ўтрымліваць вайсковы кантынгент на мяжы з Чарнігаўскай і Сумскай вобласьцямі, праводзіць выведную дзейнасьць, абстрэльвае памежжа пры дапамозе авіяцыі і дронаў.
Ва ўкраінскай аналітычнай групе DeepState сьцярвярджаюць, што на курахаўскім кірунку расейцы прасунуліся ў раёне пяці населеных пунктаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум