Кіраўніцтва Паўднёвай Карэі заявіла, што адновіць прапагандысцкую трансьляцыю ў памежных раёнах супраць рэжыму Паўночнай Карэі ў адказ на працяг правакацый па скідваньні сьмецьця на поўдзень паветранымі шарамі.
Пасьля экстраннай нарады па бясьпецы пад кіраўніцтвам дырэктара ў нацыянальнай бясьпецы Паўднёвай Карэі Чан Хо Джына чыноўнікі вырашылі ўсталяваць і пачаць трансьляцыю праз галосьнікі ў прымежных раёнах, гаворыцца ў заяве прэзыдэнцкага кабінэту, якую цытуе АР.
Чанг і іншыя прадстаўнікі службы бясьпекі Паўднёвай Карэі папракнулі Пхэньян за спробу выклікаць «неспакой і разлад» у Паўднёвай Карэі і падкрэсьлілі, што Паўночная Карэя будзе несьці «выключную адказнасьць» за любую будучую эскаляцыю напружанасьці паміж карэйскімі дзяржавамі.
У мінулыя выходныя Паўночная Карэя адправіла ў Паўднёвую сотні паветраных шароў са сьмецьцем. Гэта трэцяя правакацыя з канца траўня, паведамілі вайскоўцы Паўднёвай Карэі. Правакацыя адбылася ўсяго празь некалькі дзён пасьля таго, як паўднёвакарэйскія актывісты запусьцілі ўласныя паветраныя шары, каб раскідаць прапагандысцкія ўлёткі на Поўначы.
Паўночная Карэя да гэтага часу накіравала больш за 1000 паветраных шароў, каб скідаць тоны сьмецьця і гною на поўдзень у якасьці адплаты за паўднёвакарэйскія грамадзянскія кампаніі па распаўсюдзе ўлётак, узмацняючы напружанасьць паміж падзеленымі вайной супернікамі. Акрамя таго, захоўваецца дыпляматычны тупік з-за ядзерных амбіцый Поўначы.
Аднаўленьне практыкі галосьнікаў у Паўднёвай Карэі адбылося тады, калі краіна прыпыніла дзеяньне пагадненьня аб паслабленьні напружанасьці з Паўночнай Карэяй у 2018 годзе. Гэты крок дазволіў Поўдню аднавіць прапагандысцкія кампаніі і, магчыма, аднавіць вайсковыя вучэньні з баявой стральбой у памежных раёнах.
Аб’яднаны камітэт начальнікаў штабоў войска Паўднёвай Карэі заявіў, што Паўночная Карэя запусьціла каля 330 паветраных шароў у бок поўдня, і каля 80 былі знойдзены на тэрыторыі Паўднёвай Карэі па стане на нядзелю раніцай.
Вайскоўцы Поўдня заявілі, што паветраныя шары скінулі на краіну сьмецьце, у тым ліку плястык і папяровыя адкіды, але ніякіх небясьпечных рэчываў выяўлена не было.
Форум