Ужо сёньня: 160 гадоў таму нарадзіўся Іван Здановіч, лекар, дабрачынец, заснавальнік вучылішча для сьляпых у Менску

Дата дня:

6 чэрвеня 1864 году нарадзіўся Іван Здановіч, лекар, дабрачынец, заснавальнік вучылішча для сьляпых у Менску.

Дзень у гісторыі

1099 — падчас Першага крыжовага паходу пачалася аблога Ерусаліму.

1563 — Жыгімонт ІІ Аўгуст выдаў Віленскі прывілей, які зраўнаў у правах праваслаўных і каталікоў Вялікага Княства Літоўскага.

1905 — парлямэнт Нарвэгіі разарваў унію са Швэцыяй. Дзень незалежнасьці Нарвэгіі.

1927 — у Варшаве супрацоўнік «Беларускага слова» Барыс Каверда забіў савецкага амбасадара Пятра Войкава.

1958 — на левым узьбярэжжы Заходняй Дзьвіны пачалі будаваць горад Наваполацак.

1995 — па выніках рэфэрэндуму 14 траўня 1995 году Аляксандар Лукашэнка зацьвердзіў палажэньні аб дзяржаўным гербе і сьцягу. На зьмену бел-чырвона-беламу сьцягу і гербу «Пагоня» афіцыйна вярнуліся амаль ня зьмененыя сьцяг і герб БССР. Дэпутаты Апазыцыі БНФ у Вярхоўным Савеце заявілі пра нелегітымнасьць рэфэрэндуму.

1995 — у Менску пры поўным стадыёне «Дынама» з нацыянальнымі сьцягамі футбольная зборная Беларусі здабыла гістарычную перамогу над Галяндыяй. Пераможны гол забіў паўабаронца Сяргей Герасімец.

2019 — мастак Алесь Пушкін (памёр у зьняволеньні 11 ліпеня 2023 году) выйшаў да крамы «Эўраопт» у цэнтры Крупак з плякатамі «Achtung Russia!» і «Bloodymir!» з выявамі Пуціна, плякатамі «Stop russian agression on Europe», «Russia — war!» («Расея — вайна»), «Беларусь у NATO».

2023 — Ільля Сільчукоў, звольнены зь Менскай опэры за пратэсты, дэбютаваў на сцэне La Scala ў опэры Дворжака «Русалка».

ГЛЯДЗІЦЕ ТАКСАМА:

«Праверым на „вашывасьць“ арт-супольнасьць» — Алесь Пушкін просіць арт-крытыкаў прыехаць на суд

У гэты дзень нарадзіліся

1794 — Пётр Чаадаеў, расейскі рэлігійны філёзаф, прыхільнік каталіцтва. За крытыку праваслаўя і самаўладзтва быў абвешчаны вар’ятам.

1848 — Поль Гаген, францускі мастак.

1880 — Вацлаў Іваноўскі, палітык, вучоны, выдавец, дзяяч нацыянальна-вызвольнага руху пач. ХХ ст. і нацыянальнага руху 1-й паловы 1940-х.

1952 — Архан Памук, турэцкі пісьменьнік, ляўрэат Нобэлеўскай прэміі па літаратуры за 2006 год.

У памяці

1492 — Казімір Ягелёнчык, вялікі князь літоўскі ў 1440–1492 гадах.

1976 — Міхась Машара, заходнебеларускі паэт, савецкі празаік і перакладчык.

2022 — Мікола Аляхновіч, літаратар, лінгвіст.

ГЛЯДЗІЦЕ ТАКСАМА:

Беларускі опэрны сьпявак Ільля Сільчукоў, звольнены ў Менску за ўдзел у пратэстах, дэбютуе ў La Scala