Расея і Ўкраіна правялі чарговы абмен палоннымі — па 75 расейскіх і ўкраінскіх вайскоўцаў вярнуліся дадому.
Як паведамілі ў Міністэрстве абароны Расеі, абмен адбыўся пры пасярэдніцтве Аб’яднаных Арабскіх Эміратаў. Расейскіх палонных даставілі ў Маскву для наданьня мэдычнай дапамогі.
Прэзыдэнт Украіны Ўладзімір Зяленскі пацьвердзіў факт абмену.
«Увесь гэты час мы ні на дзень не спынялі працы, каб вярнуць дадому кожнага і кожную з расейскага палону. І сёньня маем важны вынік: яшчэ 75 нашых людзей вярнуліся ва Ўкраіну. Вайскоўцы Ўзброеных сіл і Нацыянальнай гвардыі, памежнікі, чацьвёра цывільных — усе яны ўжо на роднай зямлі», — заявіў Зяленскі.
Адначасова бакі перадалі адзін аднаму целы загінулых. Расея перадала Ўкраіне целы 212 вайскоўцаў, а Ўкраіна перадала Расеі целы 45 загінулых.
Як паведамілі ў Каардынацыйным штабе ў пытаньнях абыходжаньня з ваеннапалоннымі, ва Ўкраіну вярнулі целы вайскоўцаў, якія загінулі ў баях на данецкім, запароскім, луганскім і харкаўскім кірунках, а таксама з часова акупаваных тэрыторый Украіны.
«Узброеныя сілы Ўкраіны перавязуць целы ў вызначаныя дзяржаўныя ўстановы, а прадстаўнікі праваахоўных органаў і судова-мэдычныя экспэрты высьветляць асобы загінулых», — адзначаецца ў паведамленьні ўкраінскага каардынацыйнага штабу.
Пасьля ідэнтыфікацыі целы перададуць сваякам для пахаваньня.
Некалькі дзён таму расейскі бок заявіў аб аднабаковым спыненьні працэсу абмену. Апошні абмен адбыўся сёлета ў пачатку лютага.
Гэта 52-і з пачатку расейскага ваеннага ўварваньня абмен палоннымі. Пакуль што Ўкраіна змагла вызваліць з расейскага палону 3210 сваіх абаронцаў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум