Гуманітарная дапамога Ўкраіне скарачаецца, у той час як патрэбы краіны растуць ужо больш за два гады, папярэдзіла ў панядзелак прадстаўніца Вярхоўнага камісара ААН у справах уцекачоў ва Ўкраіне Караліна Ліндгольм Білінг.
«Рэсурсаў для аказаньня гуманітарнай дапамогі» значна менш, таму што гуманітарныя патрэбы ў сувязі з гэтымі падзеямі фактычна растуць, – сказала Ліндгольм Білінг. – Менавіта найбольш уразьлівыя слаі насельніцтва будуць пакутаваць ад скарачэньня фінансаваньня і падтрымкі».
Гуманітарны план ААН на 2024 год для Ўкраіны складае 3,1 мільярда долараў, у тым ліку 599 мільёнаў даляраў для Упраўленьня Вярхоўнага камісара ў справах уцекачоў. Аднак у першым квартале гэтага года як глябальны плян рэагаваньня, так і заклік Упраўленьня ААН былі прафінансаваныя толькі на 15%, у той час як за аналягічны пэрыяд летась фінансаваньне дасягнула 30%, паведаміла Ліндгольм Білінг.
Па меры таго, як канфлікт зацягваецца, ператвараючыся, паводле яе, ува «ультрамаратон», яна дадала, што «грашовая і гуманітарная дапамога – у форме прадастаўленьня тавараў і паслуг, дапамогі з жыльлём, рамонтам дамоў, псыхасацыяльнай падтрымкі» цяпер «менш частыя і менш прадказальныя».
Яна асабліва адзначыла наступствы наступу расейскіх войскаў на ўсходзе Харкаўскай вобласьці, у выніку якога незьлічоная колькасьць мірных жыхароў часта застаецца без элемэнтарных рэчаў, такіх як электрычнасьць і водазабесьпячэньне.
Ліндгольм Білінг заявіла, што, па стане на нядзелю, з прымежных раёнаў было эвакуавана каля 10 300 чалавек «і эвакуацыя ўсё яшчэ працягваецца». Яна адзначыла, што «тыя, хто ўсё яшчэ жыве ў гэтых прымежных паселішчах, як правіла, пажылыя людзі». Паводле яе, многія зь іх перажылі шок, і, пакідаючы раён у сьлязах, несьлі з сабой бедныя асабістыя рэчы ў плястыкавых пакетах.
«Пажылыя пары, якія жылі ў міры... зараз выкарчаваныя і жывуць у калектыўным цэнтры дзесьці ва Ўкраіне, ня ведаючы, ці змогуць яны калі-небудзь вярнуцца дадому, ці проста спрабуюць пабудаваць новае жыцьцё з нуля на новым месцы, – дадала Ліндгольм Білінг. – Яны пакінулі ўсё ззаду, і гэта сапраўды жахліва».
Яна падкрэсьліла, што ў многіх уразьлівых людзей «проста няма рэсурсаў або магчымасьцяў, каб пачаць новае жыцьцё недзе тут, у цэнтры краіны».
Прадстаўніца ААН таксама папярэдзіла, што калі колькасьць перамешчаных асоб працягне расьці, то іх прыём і дапамога будуць зьяўляцца вялізнай лягістычнай праблемай.
«Вядома, калі 10 000 чалавек ператворацца ў мільён ці больш, гэта, відавочна, створыць вялізную нагрузку на сыстэму».
Па меры таго, як канфлікт зацягваецца, а Расея пашырае свой наступ, «я думаю, што найбольшую занепакоенасьць выклікае адсутнасьць ва ўкраінцаў іншага выбару, акрамя як працягваць уцякаць», – склала яна, папярэдзіўшы, што міжнародная супольнасьць «не павінна спыняцца».
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум