На вайсковым аэрадроме Бельбек у акупаваным Расеяй Крыме пасьля ракетнай атакі адбыўся пажар на складзе з палівам.
Начны пажар пацьвердзіла маніторынгавая група «Крымский ветер» з спасылкай на зьвесткі з спадарожнікавых здымкаў.
Telegram-канал ASTRA з спасылкай на свае крыніцы паведаміў, што разам з складам гаруча-змазачных матэрыялаў таксама пацярпелі ЗРК-С-400, два самалёты МіГ-31. Сьцьвярджаюць, што 2 расейскія вайскоўцы загінулі і 13 атрымалі раненьні.
Афіцыйныя крыніцы Расеі і Ўкраіны гэтай інфармацыі не камэнтуюць.
Пазьней расейскія ўлады Крыму паведамілі аб перадухіленьні «тэракту на чыгунцы» і затрыманьні «завэрбаваных украінскімі спэцслужбамі» грамадзян.
Міністэрства абароны Расеі паведаміла, што над Крымам у ноч з 14 на 15 траўня нібыта зьбілі «10 апэратыўна-тактычных ракет ATACMS», а ў ноч на 16 траўня — яшчэ пяць такіх ракет і чатыры бесьпілётнікі.
Аэрадром Бельбек каля акупаванага Севастопаля, які цяпер выкарыстоўваюць расейскія войскі, і раней быў мішэньню для атак.
Паводле зьвестак праекту Радыё Свабода «Крым.Реалии», на гэтым аэрадроме дысьлякуюцца 38-й авіяцыйны полк вайскова-паветраных сіл Расеі, Севастопальскі авіяцыйна-выратавальны цэнтар Міністэрства надзвычайных сытуацый Расеі, базуюцца 12 самалётаў Су-27, 12 — Су-27СМ, тры навучальна-баявыя Су-27УБ і пяць двухмясцовыя Су-30М2.
Увечары 15 траўня мясцовыя і расейскія каналы паведамлялі пра выбухі ў раёне вайсковага аэрадрому Бельбек, а ў Севастопалі абвяшчалі паветраную трывогу.
Як паведаміла ўкраінская служба Радыё Свабода, шэраг крымскіх telegram-каналаў з спасылкамі на мясцовых жыхароў паведамлялі аб гуках выбухаў у Сімферопалі, Еўпаторыі, Джанкоі і Гвардзейскім, дзе таксама разьмяшчаюцца расейскія вайсковыя аэрадромы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум