У фармулёўцы анонсу суду гаворыцца пра «іншыя пытаньні, зьвязаныя з прывядзеньнем прысуду, выраку, пастановы ў выкананьне». Працэс пройдзе ў межах артыкулу 402 Крымінальна-працэсуальнага кодэксу.
Як стала вядома Свабодзе, у першым прысудзе ў «справе Ціханоўскага» пералік рэчавых доказаў заняў некалькі дзясяткаў старонак. Там былі мабільныя тэлефоны асуджаных, кампутары, аўтамабілі і іншая маёмасьць.
«Відаць, нешта ўпусьцілі ці суд вырашыў больш не захоўваць рэчавыя доказы, зьнішчыць іх. Таму праводзяць паседжаньне», — лічыць крыніца Свабоды i юрыдычных колаў.
Юрыст таксама патлумачыў, што ёсьць рэчавыя доказы, якія застаюцца пры справе назаўжды. Гэта дыскі з пратаколамі апытаньняў, апэратыўна-пошукавымі мерапрыемствамі, пратаколы аглядаў і так далей. А ёсьць такія, якія ня маюць асаблівай каштоўнасьці — гэта значкі, сьцягі, улёткі, літаратура, мэгафоны і так далей.
«Гэта ідзе на зьнішчэньне, звычайна такое рашэньне прапісваюць у прысудзе. Доказы зьнішчаюцца, калі прысуд набывае моц. Грошы і матэрыяльныя каштоўнасьці ідуць у казну, на карысьць дзяржаве. Наркотыкі, зброя, фальшывыя грошы таксама зьнішчаюцца. Тут хутчэй пытаньне пра тыя рэчавыя доказы, якія ня маюць прамога дачыненьня да прысуду. Таму і будзе разгляд», — патлумачыў юрыст.
Як паведамілі Свабодзе крыніцы, блізкія да сытуацыі, фігурантаў справы на паседжаньне прывозіць не плянуюць.
У анонсе працэсу, заяўленага на 25 красавіка, значацца палітвязьні Ігар Лосік, Дзьмітры Папоў, Арцём Сакаў, Мікола Статкевіч, Сяргей Ціханоўскі і Ўладзімер Цыгановіч, якія былі асуджаныя на закрытым працэсе ў будынку СІЗА-3 у Гомлі 14 сьнежня 2021 году.
Сяргея Ціханоўскага тады асудзілі на 18 гадоў калёніі, Міколу Статкевіча — на 14 гадоў, Ігара Лосіка і Ўладзімера Цыгановіча — на 15 гадоў, Дзьмітрыя Папова і Арцёма Сакава — на 16 гадоў.
Затрыманьне Ціханоўскага і яго прыхільнікаў. Што трэба ведаць
- Сяргей Ціханоўскі — відэаблогер, аўтар Youtube-каналу «Страна для жизни». Зьбіраўся балятавацца ў прэзыдэнты на выбарах 2020 году, але ягонай ініцыятыўнай групе адмовілі ў рэгістрацыі, калі ён быў у зьняволеньні. Але зарэгістравалі групу ягонай жонкі Сьвятланы Ціханоўскай, блогер стаў кіраўніком гэтай групы.
- У Горадні а 20-й гадзіне 29 траўня Сяргея Ціханоўскага затрымалі супрацоўнікі АМАПУ падчас перадвыбарчага пікету за вылучэньне ў прэзыдэнты ягонай жонкі. Абставіны затрыманьня нагадвалі тыя, пра якія раней казаў Лукашэнка.
- Гэта адбылося пасьля таго, як невядомая жанчына, якую сьведкі называлі правакатаркай, кідалася на блогера і спрабавала трымаць яго за вопратку. Яна патрабавала, каб Ціханоўскі адказаў, чаму ў Горадні няма яго жонкі. Ціханоўскі намагаўся сысьці ад жанчыны — зьявілася міліцыя.
- Літаральна праз паўхвіліны прыбеглі супрацоўнікі АМАП і затрымалі Сяргея Ціханоўскага, які знаходзіўся за некалькіх мэтраў ад эпіцэнтру. Пазьней затрымалі таксама шэраг паплечнікаў Ціханоўскага. МУС паведаміла пра крымінальную справу за «гвалт супраць міліцыянтаў».
- На лецішчы Ціханоўскага нібыта знайшлі 900 тысяч даляраў. Жонка мяркуе, грошы маглі падкінуць.
- 14 сьнежня 2021 году Сяргея Ціханоўскага асудзілі на 18 гадоў зьняволеньня, прызнаўшы вінаватым паводле чатырох артыкулаў Крымінальнага кодэксу: ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варожасьці); ч. 2 арт. 191 (перашкода працы ЦВК, заяву на яго падала старшыня ЦВК Лідзія Ярмошына), ч. 1 арт. 342 (арганізацыя дзеяньняў, што груба парушаюць грамадзкі парадак).
- Пасьля прысуду Ціханоўскі спачатку трапіў у папраўчую калёнію № 15 Магілёва. Але ў жніўні 2022-га яму ўзмацнілі рэжым і перавялі на 3 гады ў турму № 8 у Жодзіне, дзе зноў судзілі і дадалі яшчэ 1,5 года зьняволеньня за «непадпарадкаваньне патрабаваньням адміністрацыі». Агулам тэрмін зьняволеньня Сяргея Ціханоўскага цяпер складае 19,5 года.
- З сакавіка 2023 году сваякі Сяргея Ціханоўскага не атрымліваюць аніякай інфармацыі ад яго.
- Беларускія праваабаронцы прызналі Ціханоўскага палітычным зьняволеным.
- ПА АБСЭ і Эўрапарлямэнт патрабавалі вызваленьня Ціханоўскага, Статкевіча і іх паплечнікаў.
Форум