Пару гадоў таму Ганна Волкава атрымала расейскае грамадзянства, але ад беларускага не адмовілася, расказаў Васіль, блізкі памерлай (яго імя зьменена дзеля бясьпекі).
Апошні раз Васіль размаўляў з Ганнай некалькі тыдняў таму. Яна якраз была тады ў Беларусі, тэлефанавала яму зь Берасьця. Напярэдадні трагедыі вярнулася ў Маскву і напісала Васілю, што прывезла з дому гасьцінцы. Той адказаў 21 сакавіка, што на выходныя прыедзе ў госьці.
Ганна і яе муж Міхаіл любілі хадзіць разам на розныя мерапрыемствы, і пятнічны канцэрт гурту «Пікнік» ня стаў выключэньнем. Дачка беларускі Анастасія расказвала выданьню «Известия», што жанчына вельмі хацела трапіць туды. У 20.16 Ганна тэлефанавала дачцэ, але тая не пасьпела зьняць слухаўку. Больш беларуска не адказвала, і пазьней дзяўчына даведалася, што яе бацькі загінулі.
Сужэнцы пазнаёміліся ў Менску, куды Ганна прыехала вучыцца на псыхоляга ў 1997 годзе. Да сустрэчы зь Міхаілам у яе ўжо былі адносіны і дачка, але ў дэталі Васіль паглыбляцца ня хоча. Кажа толькі, што знаёмства з расейцам зьмяніла жыцьцё беларускі.
У Менску яна знайшла свайго каханага чалавека, да якога ў 2008 годзе пераехала ў Маскву. Ён быў адтуль родам. Зь Міхаілам у Ганны ёсьць сумеснае дзіця, яму цяпер 13 гадоў. Жылі яны ў сваёй кватэры. Пару гадоў таму Ганна атрымала расейскае грамадзянства, але ад беларускага не адмаўлялася.
Мужу Ганны было 55 гадоў, па спэцыяльнасьці ён хімік-тэхноляг, дапамагаў наладжваць бровары. У вольны час захапляўся акварыюмістыкай, ствараў экасыстэмы для жыцьця розных рыб і земнаводных. Ганна ж у Расеі стала займацца дзіцячай і падлеткавай псыхалёгіяй, дапамагала бацькам наладжваць узаемаадносіны зь дзецьмі. Як расказвае Васіль, у яе быў свой кабінэт на Чыстых прудах.
Бацькі Ганны жывуць у Берасьці. Бацьку — 71 год, маці — 69.
Вайну ва Ўкраіне Васіль і Ганна ніколі ў дэталях не абмяркоўвалі, расказаў суразмоўца «Люстэрка», але ў гэтым пытаньні жанчына выступала супраць любога гвалту.
«Ганна была за братэрства, за тое, каб усім было добра»,— адзначыў Васіль.
Па яго словах, у беларускі было шмат родных ва Ўкраіне, і зь некаторымі ўжо даўно няма сувязі.
Бацькі Ганны ўжо прыехалі ў Маскву і прабудуць там прыкладна да канца красавіка. Яе 13-гадовы сын, удакладняе Васіль, адзін не застанецца: сваякі ўжо заняліся пытаньнямі апекі. У сям’і беларускі заўсёды былі цёплыя адносіны, і зараз усе падтрымліваюць адзін аднаго. Яшчэ вельмі дапамагае салідарнасьць ад людзей навокал, дадае ён.
Прадстаўнікі беларускага пасольства, наколькі вядома Васілю, зь сямʼёй ня зьвязваліся і дапамогу не прапаноўвалі. Родныя загінулай беларускі да іх таксама не зьвярталіся. Паводле папярэдняй інфармацыі, Ганну Волкаву пахаваюць на гэтым тыдні, у сераду ці ў чацьвер. Дакладнага часу і месца пакуль няма.
