Як паведаміў губэрнатар вобласьці Вячаслаў Гладкоў, снарад патрапіў у прыватны дом у вёсцы Нікольскае. Загінулі чатыры чалавекі: сямейная пара, іх 17-гадовы сын і сталага веку маці жонкі. Другі сын пары выжыў. Па словах губэрнатара, ён цяпер знаходзіцца ў рэанімацыі мясцовага шпіталя.
Раней Гладкоў паведамляў пра яшчэ траіх пацярпелых ад абстрэлу Нікольскага. Паводле яго словаў, там пашкоджаны чатыры прыватныя дамы.
У Грайворанскай гарадзкой акрузе дрон-камікадзэ атакаваў пасёлак Горкаўскі. Загінуў адзін цывільны жыхар, два чалавекі параненыя. Паведамляецца аб пашкоджаньнях жылых дамоў, гаспадарчых пабудоў і аўтамабіляў.
Мінабароны Расеі паведаміла, што сёньня раніцай зьбіла над Белгарадзкай вобласьцю дзесяць рэактыўных снарадаў «Вампір».
Пасьля пачатку поўнамаштабнага ўварваньня Расеі ва Ўкраіну расейскія рэгіёны рэгулярна зазнаюць абстрэлы і атакі беспілётнікаў. Ёсьць разбурэньні і ахвяры. Мінабароны Расеі сьцьвярджае, што атакі вядуцца з украінскага боку. У большасьці выпадкаў Кіеў гэтыя паведамленьні не камэнтуе.
Абстрэлы Белгарадзкай вобласьці і абласнога цэнтра ўзмацніліся ў апошні тыдзень, таксама фіксаваліся спробы прарыву праз расейскую мяжу, у тым ліку з боку добраахвотніцкіх фармаваньняў, якія ваююць на баку Ўкраіны.
