У Галоўным упраўленьні выведкі Міністэрства абароны Ўкраіны паведамілі, што ў выніку атакі на расейскі патрульны карабель «Сергей Котов» 27 расейскіх маракоў атрымалі раненьні рознай цяжкасьці.
5 сакавіка ўкраінская вайсковая выведка паведаміла, што 7 расейскіх вайскоўцаў загінулі, 6 атрымалі раненьні. Астатнія 52 чальцы экіпажу, імаверна, змаглі эвакуавацца.
У Расеі дагэтуль не камэнтуюць ні страту чарговага карабля, ні асабовага складу.
У выведцы Вялікай Брытаніі паведамілі, што ўкраінцы атакавалі патрульны карабель «Сергей Котов» тройчы — у ліпені 2022, у верасьні 2023 і ў сакавіку 2024 году, калі, уласна, і ўдалося яго зьнішчыць. Вайсковая выведка Вялікай Брытаніі адзначыла, што Чарнаморскі флёт Расеі за апошнія пяць тыдняў страціў тры караблі.
5 сакавіка ўкраінская выведка абнародавала перахопленую размову расейскіх вайскоўцаў пасьля зьнішчэньня карабля (пацьвердзіць сапраўднасьць гэтага запісу ва ўмовах вайны немагчыма. — РС). У размове адзін вайсковец паведаміў аб «трагічнай начной падзеі», калі пяць безэкіпажных катэраў атакавалі карабель «Сергей Котов». З гэтай размовы стала вядома, што на караблі знаходзіўся яшчэ і баявы верталёт, таксама зьнішчаны ў выніку ўдару па караблі.
