Целы 10-гадовага хлопчыка і яго 8-гадовай сястры знайшлі пад заваламі шматпавярховага дому ў Адэсе, ў які 2 сакавіка трапіў расейскі бесьпілётнік «Шахед», паведаміў журналістам увечары 3 сакавіка Алег Кіпер, кіраўнік абласной ваеннай адміністрацыі.
«Яшчэ адно памерлае дзіця — дзяўчынка Злата. Ёй было восем гадоў. Зараз ратавальнікі дэблякуюць іхныя з братам Сяргеем целы», — напісаў кіраўнік АВА.
Раней ён паведаміў, што ратавальнікі знайшлі пад заваламі цела 10-гадовага хлопчыка.
Колькасьць загінулых у Адэсе вырасла да 12 чалавек.
Раней Дзяржаўная служба надзвычайных сытуацыяў Украіны ў Адэскай вобласьці паведаміла, што пад заваламі шматпавярховага дому ў Адэсе могуць быць яшчэ чатыры чалавекі.
Ратавальныя працы працягваюць, пад заваламі яшчэ могуць заставацца людзі.
3 сакавіка ў Адэсе абвясьцілі днём жалобы.
У выніку трапляньня бесьпілётніка адзін пад’езд дзевяціпавярховага жылога дому практычна цалкам разбураны. 18 кватэраў у гэтым доме зьнішчана і, паводле папярэдніх зьвестак, яшчэ 7 пашкоджаныя, паведаміла мэрыя гораду.
Расейскія вайскоўцы мэтанакіравана ўдарылі па жылым доме ў Адэсе, побач не было ніякіх вайсковых абʼектаў, — сьцьвярджае генэральны пракурор Украіны Андрэй Косьцін. «Гэта ня проста абстрэлы, гэта палітыка, накіраваная на тэрор і зьнішчэньне ўкраінцаў. Гэта атака на жылы дом...» — прыводзіць яго словы «РБК-Украіна».
Прэзыдэнт Украіны Ўладзімір Зяленскі, камэнтуючы ўдар па Адэсе, заявіў, што Ўкраіне неабходна ад яе партнэраў больш сродкаў супрацьпаветранай абароны , каб абараніць людзей.
Паводле зьвестак Сілаў абароны поўдня Ўкраіны, у ноч на 2 сакавіка расейскае войска атакавала Адэскую вобласьць васьмю дронамі «Шахед». Сем зь іх удалося зьбіць. Расея ўдары па Адэсе пакуль не камэнтавала.
