Аляксандар Лукашэнка заявіў, што з Расеяй удалося «пабудаваць такія саюзныя дачыненьні, якіх на плянэце ніхто ня ведаў і ня ведае», але прызнаўся, што вяліся перамовы аб стварэньні адзінага мытнага органа.
«Расея і Беларусь — сувэрэнныя, незалежныя дзяржавы. З гэтага трэба зыходзіць пры ўхваленьні тых ці іншых рашэньняў. І, як бачыце, у нас атрымліваецца пабудаваць такія саюзныя дачыненьні, якіх на плянэце ніхто ня ведаў і ня ведае», — працытавала Аляксандра Лукашэнку дзяржаўнае агенцтва БелТА.
18 студзеня ён на нарадзе з урадам Беларусі заявіў, што пры ўніфікацыі беларускага заканадаўства з расейскім «нельга ўшчамляць інтарэсы дзяржавы».
Аляксандар Лукашэнка паведаміў, што пры ўніфікацыі мытнага заканадаўства гучалі прапановы «ледзь не стварыць адно міністэрства або мытны камітэт».
«Мы катэгарычна ад гэтага адмовіліся і дамовіліся на вышэйшым савеце, што створым адзіную групу, якая будзе ўносіць рэкамэндацыі, бачыць, як ажыцьцяўляецца мытны кантроль і гэтак далей, не пазбаўляючы дзяржавы гэтых паўнамоцтваў і функцый. Гэта гаворыць пра тое, што мы, Расея і Беларусі, сувэрэнныя, незалежныя дзяржавы. І з гэтага трэба зыходзіць пры ўхваленьні тых ці іншых рашэньняў», — паведаміў ён.
Пра вывад замежнага капіталу зь Беларусі
Аляксандар Лукашэнка выказаў патрабаваньне да ўраду імгненна супрацьдзейнічаць вываду капіталу зь Беларусі ў «недружалюбныя дзяржавы». «Ёсьць кампаніі — нашы, ня нашы. Атрымалі прыбытак, грошы нейкія, і вывелі за межы Беларусі, разьмясьцілі на рахунках. Грошы, заробленыя нашымі людзьмі, выводзяць за межы Беларусі і там працуюць на розных нягоднікаў».
«Санкцыі — традыцыйная і шматкроць адпрацаваная практыка ціску так званых сусьветных лідэраў на няўгодныя ім краіны. На жаль, гэта, калі можна так сказаць, модны эканамічны трэнд. Такім чынам і Штаты, і Эўрапейскі зьвяз даўно распраўляюцца з канкурэнтамі», — заявіў ён.
Пры гэтым Лукашэнка адзначыў, што Беларусь прапануе іншаземцам лепшыя ўмовы — прэфэрэнцыі, ільготы і інфраструктуру. «Прыходзь і працуй. Але не дзеля нажывы за кошт нашага народу. А калі нехта паспрабуе, то ёсьць мэханізмы супрацьдзеяньня і ўтлумачваньня», — папярэдзіў ён.
Канфіскацыя маёмасьці іншаземных кампаній у адказ на выхад зь Беларусі
Аляксандар Лукашэнка лічыць, што ўрад «цудоўна разабраўся» з маёмасьцю кампаніі McDonald’s.
«Мы дамовіліся: ніякай маёмасьці мы нікому не прадаём, не перадаём, калі ў выніку санкцый або іншых нейкіх прычын іншаземцы, якія тут маюць уласнасьць, прадпрыемствы, кампаніі, пакідаюць наш рынак. Як я казаў, дасьвідос, мы разьбярэмся самі. І, як паказвае той жа „Макдональдс“, мы цудоўна з гэтым разабраліся: людзі з задавальненьнем ходзяць туды».
