У Наваполацку і Полацку затрымалі больш за 30 чалавек, зьвязаных з чатам аматараў роварных прабегаў, расказалі на тэлеканале «Беларусь-1», гэта заўважыла «Люстэрка».
Прапагандысты паведамілі, што «назіраецца нэгатыўная тэндэнцыя» ўступленьня ў закрытыя чаты. Як прыклад там прывялі чат аматараў роварных прабегаў. У ім нібыта пачалі публікаваць «розныя заклікі да выхаду на несанкцыянаваныя мерапрыемствы».
Цяпер улады лічаць, што гэты чат ператварыўся ў супольнасьць, у якой «выношвалі і абмяркоўвалі пляны ў зьвяржэньні дзейнай улады неканстытуцыйным шляхам».
З гэтай нагоды сілавікі затрымалі больш за 30 чалавек, заявілі ў рэпартажы на тэлеканале.
Адміністратара чату прыцягнулі да адказнасьці, расказалі ў прапагандысцкім рэпартажы. Там адзначылі, што ўдзельнікі чату радаваліся «фота, на якім летам у Наваполацку хуліган абліў белай фарбай машыну грамадзяніна Расеі» — на ёй была сымболіка зь літарай «Z», якой карыстаюцца прыхільнікі вайны супраць Украіны.
Прапагандысты таксама паказалі некалькі відэа з затрыманымі людзьмі.
Таксама ёсьць інфармацыя, што многіх людзей у рэгіёне затрымлівалі ў справе Сяргея Ерамеева, якога затрымалі ў Расеі, абвінавацілі ў падрыве цягнікоў у Паўночна-Муйскім тунэлі БАМа і этапуюць у Іркуцк.
