Падчас моцных сьнегападаў у Маладэчне засталася працаваць толькі адна служба таксі з трох, якія ёсьць у горадзе. Працу дзьвюх астатніх службаў службаў міліцыя правярае ўжо цягам трэці дзень. Праверку вядуць у дачыненьні маладэчанскіх апэратараў таксі 152 і 158, піша Kraj.by.
Вядома, што ў канцы мінулага тыдня ў офісы гэтых службаў прыйшлі сілавікі і падатковая інспэкцыя.
Згодна з папярэднімі дадзенымі, 200 машын ня выехалі ў горад.
14 лістапада Аляксандар Лукашэнка запатрабаваў узмацніць кантроль у галіне пасажырскіх перавозак і загадаў выпрацаваць «адзіныя правілы гульні».
Ужо 20 лістапада на дзяржаўным тэлеканале «Беларусь-1» выйшаў сюжэт аб крымінальнай справе за ўхіленьне ад выплаты падаткаў у дачыненьні буйнога інтэрнэт-агрэгатара ў сфэры пасажырскіх зносінаў Аtlasbus — у відэа яго называюць «бандай „чорных перавозьнікаў“».
Прапагандысты сьцьвярджаюць, што фігуранты — больш за 20 абвінавачаных і падазраваных — вялі свае справы пры дапамозе «шантажу, пагрозаў, сабатажу».
Таксама вядома, што транспартная інспэкцыя Міністэрства транспарту за 10 месяцаў 2023 году правяла «каля 820 кантрольных закупак».
Па выніках апэрацый выявілі больш за тысячу парушэньняў і канфіскавалі 185 аўтамабіляў.
- Узмоцненыя праверкі ў сфэры аўтаперавозак у Беларусі пачаліся пасьля ДТЗ з удзелам маршруткі пад Смалявічамі 20 лютага 2023 году, у якім загінулі 13 чалавек. З красавіка транспартная інспэкцыя пачала больш актыўна прымяняць часовае адбіраньне транспарту.
- Пасьля шэрагу праверак на пачатку сакавіка Юры Касьцюк заявіў, што пакуль павысіць узровень бясьпекі пасажырскіх перавозак спрабуюць з дапамогай прафіляктычных рэйдаў і штрафаў, але з улікам цяжкасьці ўчыненьня парушэньняў могуць нават адабраць аўтамабіль, бо «ня ўсе рэагуюць на штрафы».
- 14 красавіка прадстаўнік Мінтрансу паведаміў пра першы выпадак канфіскацыі маршруткі за ажыцьцяўленьне незаконнай дзейнасьці ў перавозцы пасажыраў.
Цяпер рыхтуецца да прыняцьця праект указу аб аўтамабільных перавозках пасажыраў, які можа істотна зьмяніць рынак таксі і маршрутак у Беларусі. Сярод іншага, згодна з указам:
- створаць дзяржаўны рэестар перавозак пасажыраў;
- перавозчыкаў і дыспэтчараў прымусяць даваць дзяржаўным органам доступ да інфармацыі аб выкананых заказах;
- дыспэтчараў вымусяць адкрыць юрыдычную асобу ў Беларусі і разьмясьціць сэрвэры ўнутры краіны;
- у кожным аўтамабілі ўсталююць камэры відэаназіраньня.
