Прэзыдэнт Расеі Ўладзімір Пуцін на сустрэчы ў Крамлі з кіраўніком Генштаба Валерыем Герасімавым заявіў аб Велікодным перамір’і.
«Расейскі бок спыняе ўсе баявыя дзеяньні з 18:00 19 красавіка да 00:00 21 красавіка»,— гаворыцца ў паведамленьні Крамля.
«Кіруючыся гуманітарнымі меркаваньнямі, сёньня з 18.00 да 00.00 з нядзелі на панядзелак расейскі бок аб’яўляе велікоднае перамірʼе. Загадваю на гэты пэрыяд спыніць усе баявыя дзеяньні. Зыходзім з таго, што ўкраінскі бок рушыць усьлед нашаму прыкладу. Пры гэтым нашы войскі павінны быць гатовыя да магчымых парушэньняў перамірʼя і правакацыяў з боку суперніка, любых яго агрэсіўных дзеяньняў», — сказаў Уладзімір Пуцін.
Пры гэтым Пуцін заклікаў сваіх вайскоўцаў быць пільнымі, гатовымі да нанясеньня адказу ў выпадку парушэньняў замірэньня.
У Мінабароны Расеі 19 красавіка пасьля загаду Пуціна паведамілі, што рэжым спыненьня агню будзе выконвацца пры ўмове яго ўзаемнага захаваньня украінскім бокам.
Рэакцыя Зяленскага: «У нашым небе выявілі расейскія бесьпілётнікі»
Прэзыдэнт Украіны Ўладзімір Зяленскі ўвечары 19 красавіка пракамэнтаваў заяву Крамля аб Велікодным перамір’і.
У сваім Telegram-канале ён назваў гэта спробай гульні з жыцьцямі людзей і ўказаў на паветраную трывогу ў некалькіх рэгіёнах Украіны:
«У 17.15 у нашым небе былі выяўленыя расейскія ўдарныя бесьпілётнікі. Украінская СПА і авіяцыя ўжо прыступілі да працы па абароне. „Шахеды“ ў нашым небе — гэта сапраўднае стаўленьне Пуціна да Вялікадня і да жыцьцяў людзей».
У прыватнасьці, мэр Кіева Віталь Клічко паведаміў аб працы супрацьпаветранай абароны ад расейскіх бесьпілётнікаў на левым беразе сталіцы Ўкраіны.
Міністар замежных спраў Украіны Андрэй Сыбіга заявіў, што Ўкраіна пагадзілася з прапановай ЗША аб поўным часовым спыненьні агню на 30 дзён 11 сакавіка і хоча, каб расейскія войскі фактычна спынілі агонь на ўсіх напрамках.
«Пазыцыя Ўкраіны застаецца яснай і пасьлядоўнай: яшчэ ў Джыдзе 11 сакавіка мы безумоўна пагадзіліся з прапановай ЗША аб поўным часовым спыненьні агню на 30 дзён.
Расея адмовілася, і гэтая расейская адмова ЗША цягнецца 39 дзён. Замест гэтага за гэты час маскоўскі рэжым высоўваў розныя ўмовы і ўзмацняў тэрор супраць Украіны, мірнага насельніцтва і грамадзянскай інфраструктуры па ўсёй нашай краіне.
Цяпер Пуцін зрабіў заявы аб сваёй нібыта гатоўнасьці да спыненьня агню. 30 гадзін замест 30 дзён. На жаль, у нас ёсьць значны досьвед, калі яго заявы не адпавядалі яго дзеяньням. Мы ведаем, што ягоным словам нельга верыць, і будзем глядзець на дзеяньні, а не на словы».
Сыбіга падкрэсьліў, што Расея можа ў любы момант пагадзіцца з прапановай аб поўным і безумоўным спыненьні агню на 30 дзён, якая знаходзіцца на стале з сакавіка.
Што казаў раней Трамп
17 красавіка прэзыдэнт ЗША Дональд Трамп заявіў, што чакае адказу ад Масквы наконт спыненьня баявых дзеяньняў ва Ўкраіне «да канца тыдня». Пра гэта ён сказаў у Белым доме падчас сустрэчы з прэм’ер-міністаркай Італіі Джорджай Мэлёні.
У Трампа спыталі, у які момант ён вызначыцца, ці гатовая Расея да спыненьня агню і, пры патрэбе, узмоцніць санкцыі супраць яе.
«Паглядзім. Мы атрымаем ад іх адказ на гэтым тыдні, вельмі хутка, і пабачым», — адказаў тады прэзыдэнт ЗША.
У студзені 2023 года Пуцін даручаў міністру абароны Сяргею Шайгу ўвесьці рэжым спыненьня агню па ўсёй лініі судакрананьня ва Ўкраіне на праваслаўныя Каляды. Аднак баі тады не спыняліся.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Форум