На месца зьнятай «Пагоні» нехта павесіў ксэракопію з выявай герба. Мэмарыял месьціцца на фасадзе каледжу Кіеўскага нацыянальнага ўнівэрсытэту тэхналёгій і дызайну па адрасе Беларуская, 22.
Беларуская валянтэрка Карына Пацёмкіна апублікавала на сваёй старонцы ў Фэйсбуку фота мэмарыялу, зробленае ўкраінскім блогерам Сьвятаславам Верыжэнкам. Яна рэкамэндуе пісаць звароты ў Кіеўскую адміністрацыю з просьбай растлумачыць тое, што адбылося.
«Фізычныя асобы павінны атрымаць адказ цягам 30 дзён у выглядзе ліста», — піша яна.
Мэмарыял, які ўрачыста адкрылі ў сакавіку 2016 году, ушаноўвае памяць Міхася Жызьнеўскага, які загінуў у 2014 годзе падчас «Рэвалюцыі годнасьці», а таксама тых беларусаў, якія загінулі падчас баявых дзеяньняў. Яшчэ да маштабнага ўварваньня расейскіх войскаў ва Ўкраіну 24 лютага 2022 году, у баях на ўсходзе Ўкраіны загінулі 10 ураджэнцаў Беларусі — яны ваявалі ў складзе добраахвотніцкіх батальёнаў і ва ўкраінскіх Узброеных сілах.
