Парадак інфармваньня вызначаны ў сумеснай пастанове МУС і МЗС, якая зьявілася на Нацыянальным праўным партале і ўжо набыла моц.
Інфармацыю можна падаць праз адзіны партал электронных паслуг (platform.gov.by), асабіста прыйсьці ў органы ўнутраных справаў або дыпляматычнай службы, а таксама праз інфармацыйную сыстэму ўліку і апрацоўкі зваротаў грамадзян і юрыдычных асобаў.
Калі ж няма тэхнічнай магчымасьці падаць інфармацыю такім чынам, можна даслаць ліст у дыпляматычнае прадстаўніцтва электроннаю поштаю, абавязкова ў дамэнным імені mfa.gov.by.
Можна накіраваць і пісьмовы зварот у орган унутраных справаў ці дыпляматычнай службы. Ад заяўніка чакаюць дзьвюх папераў: запоўненага апавяшчэньня і копіі старонак замежнага дакумэнту. Падаваць такія зьвесткі трэба і пра дзяцей.
11 ліпеня набыла моц новая рэдакцыя закону «Аб грамадзянстве Рэспублікі Беларусі». Дакумэнт, сярод іншага, прадугледжвае, што беларусы абавязаны паведамляць пра наяўнасьць у іх замежнага дазволу на жыхарства або дакумэнтаў на льготы ў іншай дзяржаве.
Адказнасьці за невыкананьне гэтага патрабаваньня пакуль няма. За першыя 10 дзён дзеяньня абноўленай рэдакцыі закону ў міліцыю пра сябе паведамілі толькі каля 100 чалавек.
Пры звароце ў консульствы Беларусі па абмен пашпарту грамадзянін Беларусі мусіць запоўніць адпаведнае паведамленьне аб відзе на жыхарства (сталым або часовым) і стаць на консульскі ўлік. Супрацоўнікі консульстваў робяць копію замежнага дакумэнту.
