«Я прыняла рашэньне вызваліць Аляксандра Азарава ад пасады ў Аб’яднаным пераходным кабінэце. Разам з тым я б хацела, каб Аляксандар Азараў працягнуў працу пры кабінэце ў пляне «Перамога» і каардынаваў супрацу зь беларускім падпольлем. Такім чынам, пазыцыя прадстаўніка ў аднаўленьні правапарадку робіцца вакантнай, і мы будзем шукаць адпаведную кандыдатуру», — сказала Сьвятлана Ціханоўская.
Раней Каардынацыйная рада не ўзгадніла кандыдатуру прадстаўніка Аб’яднанага пераходнага кабінэту ў аднаўленьні правапарадку Аляксандра Азарава і не рэкамэнавала падаўжаць яго прадстаўнічыя функцыі.
Камэнтуючы Свабодзе гэтае рашэньне, Азараў назваў яго вынікам «спэцапэрацыі КДБ і ФСБ».
Новыя прызначэньні Ціханоўскай
Сьвятлана Ціханоўская заявіла, што неўзабаве будзе прызначаны кіраўнік апарату Аб’яднанага пераходнага Кабінэту, які падасьць агульную стратэгію.
Дэмакратычныя лідэрка паведаміла, што ўзімку пройдуць выбары ў Каардынацыйную раду, каб тая стала сапраўдным прадстаўнічым органам беларусаў. Перад выбарамі адбудзецца справаздача Каардынацыйнай рады.
Сьвятлана Ціханоўская паведаміла, што кіраўніком місіі дэмакратычнай Беларусі ў Кіеве прызначыла Генадзя Манько, які цягам апошняга году адказваў за супрацу Аб’яднанага пераходнага кабінэту з полкам Каліноўскага.
Маргарыта Ворахава стала дарадцай Сьвятланы Ціханоўскай ў моладзевай палітыцы і студэнцтве.
Сьвятлана Ціханоўская не абвяшчала цалкам склад Аб’яднанага пераходнага кабінэту. У выніку справаздачаў паўнамоцтвы на наступны год пацьвердзілі кіраўніку блёку «Транзыт улады» Паўлу Латушку, блёку «Замежныя справы» — Валеру Кавалеўскаму, блёку «Абарона і нацыянальная бясьпека» — Валеру Сахашчыку і блёку «Нацыянальнае адраджэньне» — Аліне Коўшык.
Вакантнымі засталіся пасады кіраўнікоў сілавога і эканамічнага блёкаў пасьля сыходу зь іх адпаведна Аляксандра Азарава і Тацяны Зарэцкай.
Аб’яднаны пераходны кабінэт Беларусі — калектыўны выканаўчы орган дэмакратычных сілаў Беларусі, створаны 9 жніўня 2022 году Сьвятланай Ціханоўскай. У кабінэт, які дзейнічае ў эміграцыі з цэнтральным офісам у Вільні (Літва), уваходзяць прадстаўнікі дэмакратычнага руху, бізнэсу і сілавога блёку Беларусі, якія прызнаюць Ціханоўскую нацыянальнай лідэркай.
