«Нашы ўзброеныя сілы нанесьлі добры ўдар і раніцай вельмі гучна ў пасёлку Рыкава Генічанскага раёну, часова акупаванай тэрыторыі Херсонскай вобласьці. Там быў вельмі значны склад БК. Ён зьнішчаны», — паведаміў кіраўнік Грамадзкай рады пры Адэскай абласной ваеннай адміністрацыі Сяргей Братчук.
Раней фатаграфіі і відэазапісы буйнога выбуху, як мяркуецца, у ваколіцах Генічэска сталі распаўсюджвацца ў мясцовых тэлеграм-каналах. На іх бачны вялізны шлейф дыму, які ўзнімаецца далёка на гарызонце, і чуваць гукі выбухаў.
Пра выбухі на складзе таксама паведаміў мэр Мелітопаля Іван Фёдараў. Паводле яго слоў, выбухі на складзе пачаліся каля 4-ай раніцы.
Сьпікер камандаваньня Паветраных сіл Украіны Юрый Ігнат пацьвердзіў зьнішчэньне склада боепрыпасаў расейскіх вайскоўцаў каля акупаванага Генічаска ў Херсонскай вобласьці.
«Вы ўжо, відаць, бачылі працу ў вёсцы Рыкава, падпаленыя склады боепрыпасаў. Камандуючы ўжо падзякаваў у сябе ў афіцыйным тэлеграм-канале хлопцам за добрую працу», — падкрэсьліў Ігнат у эфіры ўкраінскага тэлемаратона.
Расейскі бок пакуль ніяк не камэнтаваў гэтыя заявы.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, пакуль немагчымая.
Рыкава знаходзіцца прыкладна ў 20 км ад Генічэска, партовага горада на беразе Азоўскага мора, акупаванага зь першых дзён поўнамаштабнага расейскага ўварваньня ва Ўкраіну.
