Дэпутат Палаты прадстаўнікоў Нацыянальнага сходу, лідэр ЛДПБ Алег Гайдукевіч і намесьнік старшыні Белтэлерадыёкампаніі Сяргей Гусачэнка аспрэчвалі ўведзеныя супраць іх санкцыі Эўразьвязу, але Эўрапейскі суд 24 траўня адхіліў іхныя пазовы.
Як піша Reform.by, на думку Гайдукевіча і Гусачэнкі, санкцыі нібыта носяць характар калектыўнай адказнасьці, нясуць памылковую ацэнку і парушаюць прынцып суразмернасьці. Гайдукевіч запэўніваў, што выказваў свой асабісты пункт гледжаньня ў якасьці дэпутата, а Гусачэнка ўспомніў аб свабодзе выказваньня думак.
Рада Эўразьвязу, якая выступала як пазваны бок у судзе, прадставіла довады, якія абгрунтоўваюць санкцыі.
Суд разгледзеў довады бакоў і прыйшоў да высновы, што рашэньне аб увядзеньні санкцый абгрунтаванае, пазваны даў пераканаўчыя тлумачэньні свайго рашэньня: Гайдукевіч па сутнасьці зьяўляецца прадстаўніком рэжыму Лукашэнкі, а Гусачэнка займаецца прапагандай і ўзначальвае дзяржаўнае прапагандысцкае мэдыя.
Згодна з пастановамі (1 і 2) Пятай палаты Суду Эўразьвязу, Гайдукевічу і Гусачэнку прадпісана аплаціць, у дадатак да іхных уласных расходаў, расходы, панесеныя Радай Эўразьвязу.
Гайдукевіч і Гусачэнка трапілі пад санкцыі Эўразьвязу 21 чэрвеня 2021 году. Дзеячоў беларускага рэжыму прадстаўляў адвакат Адвакацкай палаты Парыжу Зьміцер Ліцвінскі.
Што казаў Гайдукевіч раней
У сеціве захавалася відэа ад 23 красавіка 2023 году, у якім Алег Гайдукевіч ў інтэрвію дзяржаўнаму тэлеканалу СТВ кажа:
«Я ўдзячны Захаду за санкцыі, увядзіце, прашу, яшчэ 15 пакетаў санкцый, каб у апошняга чыноўніка і бізнэсоўца зь Беларусі і Расеі назаўсёды адпала жаданьне глядзець у ваш бок».
У базе суду ёсьць яшчэ некалькі пазоваў, пададзеных Ліцьвінскім ад імя грамадзян Беларусі Аляксандра Бахановіча, Сяргея Рубніковіча і Сяргея Срыбы. У адносінах да іх 21 чэрвеня 2021 года таксама былі ўведзены санкцыі ЭЗ. На момант увядзеньня санкцый Бахановіч зьяўляўся рэктарам Берасьцейскага дзяржаўнага тэхнічнага ўнівэрсытэту, Рубніковіч — рэктарам Беларускага дзяржаўнага мэдыцынскага ўнівэрсітэту, а Скрыба — прарэктарам у выхаваўчай рабоце БДЭУ. Рашэньні наконт іх, мяркуючы па базе, яшчэ не прынятыя.
24 траўня cуд Эўразьвязу таксама адхіліў пазовы дэпутатаў Палаты прадстаўнікоў Сьвятланы Любецкай і Аляксандра Амельянюка. Яны спрабавалі аспрэчыць санкцыі, якія Эўрапейскі зьвяз наклаў на іх 21 чэрвеня 2021 году. Эўрапейскі суд у Люксэмбургу пастанавіў адхіліць пазоў і абавязаў заяўнікаў аплаціць выдаткі пазванага.
