Ведамства сьцьвярджае, што бесьпілётнікі належалі Ўзброеным сілам Украіны і ўсе яны нібыта былі «зьнішчаныя агнём са штатнага ўзбраеньня расейскага карабля». Мінабароны таксама апублікавала 10-сэкунднае відэа, на якім, як сьцьвярджаецца, відаць зьнішчэньне бесьпілётнікаў.
Украіна не камэнтавала заяву расейскага вайсковага ведамства.
Раніцай пра напад марскіх бесьпілётнікаў на карабель пісаў шэраг расейскіх тэлеграм-каналаў, якія асьвятляюць вайну, прычым некаторыя зь іх сьцьвярджалі, што напад адбыўся значна бліжэй да турэцкага ўзьбярэжжа, чым паведаміла Мінабароны РФ.
Карабель «Іван Хурс» — выведны карабель 2017 году, ён забясьпечвае сувязь, вядзеньне выведкі і радыёэлектроннай барацьбы, выяўленьне радыёсыгналаў, а таксама кіраваньне флётам і сачэньне за сыстэмамі супрацьракетнай абароны. Гэта ўнікальнае судна для Чарнаморскага флёту Расеі — такіх у ВМС РФ усяго два.
Вайсковы аналітык Ян Мацьвееў выказаў меркаваньне, што расейскі бок абвінавачвае ў нападзе Ўкраіну, каб, «мабыць, зайсьці на новую спробу адмяніць збожжавае пагадненьне». Тэкст пагадненьня, падпісанага бакамі, наўпрост забараняе вайсковым караблям, бесьпілётнікам і самалётам набліжацца да гуманітарнага калідора на вызначаную адлегласьць і тым больш рухацца па ім.
Раніцай 24 траўня ў сацыяльных сетках таксама зьявіліся кадры з густым дымам паблізу Керчанскага моста, які злучае акупаваны Крым з Расеяй. Паведамлялі, што мост быў перакрыты для руху. Прызначаны Расеяй кіраўнік акупаванага паўвострава Сяргей Аксёнаў заявіў, што «Крымскі мост закрыты з прычыны вучэньняў, якія праводзяцца ў раёне».
Каля 11-й раніцы мост зноў адкрылі для руху. Пра нейкія вайсковыя вучэньні на паўвостраве акупанты загадзя не папярэджвалі, Украіна таксама не камэнтавала інцыдэнт.
