Ва Ўкраіне ў сацыяльных сетках пачалі акцыю за ўганараваньне ўкраінскага палоннага вайскоўца, якога, як мяркуецца, расстралялі з аўтамата расейцы.
6 сакавіка відэазапіс апублікаваў шэраг расейскіх тэлеграм-каналаў. На ім відаць, як бяззбройнага ўкраінскага вайскоўца расстралялі пасьля таго, як ён выгукнуў «Слава Ўкраіне!». У яго выпусьцілі аўтаматную чаргу, суправаджаючы гэта абразьлівымі словамі.
Ва Ўкраіне зьявіліся зьвесткі, што ўжо ідэнтыфікавалі забітага, але сваякі просяць цішыні.
«Шэсьць прадстаўнікоў сям’і ўпэўнены, што гэта іхны брат і сын. Я ўжо была ў дарозе да іх, але сястра сказала: „Маме вельмі кепска, просім цішыні“. Паважаю іхнае права. І таксама дапамагаю прэс-афіцэрам і камандзірам знайсьці яго. Бо, на мой погляд, менавіта цяпер гэта права спэцслужбаў і Ўзброеных сіл высьветліць праўду і сказаць тое, што можна. Наступнае выпрабаваньне — знайсьці лякацыю і цела», — паведаміла журналістка выданьня «Українська правда» Сафія Кочмар-Цімашэнка.
Міністар замежных спраў Украіны Дзьмітро Кулеба выступіў з заявай, у якой патрабаваў ад Міжнароднага крымінальнага суду тэрмінова пачаць расьсьледаваньне імавернага ваеннага злачынства.
«Жахлівы відэазапіс бяззбройнага ўкраінскага вайсковапалоннага, пакаранага расейскімі войскамі толькі за тое, што ён сказаў „Слава Ўкраіне“. Яшчэ адзін доказ таго, што гэтая вайна зьяўляецца генацыдам», — напісаў Дзьмітро Кулеба на сваёй старонцы ў Twitter.
Упаўнаважаны Вярхоўнай Рады Ўкраіны ў правах чалавека Дзьмітро Лубінец накіраваў відэазапіс расстрэлу ўкраінца міжнародным партнэрам і калегам.
«Расстрэл украінскага вайскоўца, які трапіў у палон, — гэта парушэньне Жэнэўскіх канвэнцый. Гэта праява нізасьці і подласьці. Мэта Ўкраіны, як і ўсяго дэмакратычнага сьвету, прыцягнуць Расею да адказнасьці», — заявіў Дзьмітро Лубінец.
Прэзыдэнт Украіны Ўладзімір Зяленскі паабяцаў знайсьці забойцаў украінскага жаўнера.
«Зьявілася відэа, на якім відаць, як акупанты па-зьверску забілі салдата, які мужна сказаў ім у твар: „Слава Ўкраіне!“. Я хачу, каб мы ўсе разам, у адзінстве адказалі на яго словы: „Герою слава! Героям слава! Слава Ўкраіне!“ І мы знойдзем забойцаў», — заявіў Уладзімір Зяленскі.
Больш пра асобу ўкраінскага вайскоўца, абставіны яго палону і тое, дзе менавіта зьнялі відэа, пакуль невядома.
Згодна з Жэнэўскай канвэнцыяй аб абыходжаньні з ваеннапалоннымі, падпісанай, у прыватнасьці, Расеяй, палонным павінны быць гарантаваны жыцьцё і гуманныя ўмовы ўтрыманьня. Пакараньне сьмерцю або жорсткае абыходжаньне з ваеннапалоннымі адносіцца да ваенных злачынстваў.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
