Паўднёвая Карэя ўзмацніла жорсткасьць экспартных абмежаваньняў у дачыненьні да Беларусі і Расеі, значна пашырыўшы сьпіс тавараў, на якія яны распаўсюджваюцца, паведамляе агенцтва Yonhap.
У гадавіну ўварваньня расейскіх войскаў ва Ўкраіну, урад Паўднёвай Карэі пашырыў пералік прадукцыі, якая падлягае экспартнаму кантролю пры адпраўцы ў Беларусь і Расею, у які дадаткова ўвайшоў 741 від тавараў: станкі, падшыпнікі, цеплаабменьнікі, абсталяваньне і іншае.
У Паўднёвай Карэі патлумачылі гэты крок тым, што захоўваецца высокая верагоднасьць, што гэтыя прадметы будуць выкарыстоўвацца краінамі-імпарцёрамі ў якасьці зброі і ў вайсковых мэтах, нягледзячы на тое, што яны не клясыфікуюцца як стратэгічныя прадметы ў адпаведнасьці са схемай экспартнага кантролю Паўднёвай Карэі.
На рашэньне ўлад Паўднёвай Карэі адрэагавала амбасада Беларусі ў гэтай краіне:
«Амбасада са шкадаваньнем успрымае дзеяньні паўднёвакарэйскага міністэрства гандлю, прамысловасьці і энэргетыкі па пашырэньні сьпісу экспартнага кантролю ў Рэспубліку Беларусь на 741 пазыцыю тавараў. Гэтыя крокі дакладна ня будуць садзейнічаць вырашэньню крызісных зьяў у эканоміцы, з якімі сутыкаецца большасьць краін», — адзначылі ў беларускай дыпмісіі.
У канцы сакавіка 2022 года Паўднёвая Карэя першы раз увяла абмежаваньні на экспарт у Беларусь і Расею 57 нестратэгічных тавараў і тэхналёгій. Пад санкцыі тады патрапілі, у прыватнасьці, паўправаднікі і кампутарная тэхніка.