Пра гэта гаворыцца ў паведамленьні прэс-службы ведамства.
Супрацоўнікі СБУ праводзілі ператрусы ў аб’ектах УПЦ (МП) у Херсонскай, Чаркаскай, Жытомірскай і Валынскай вобласьцях.
СБУ вызначыла, што настаяцель Успенскага сабору ў Херсоне быў у Крамлі падчас абвяшчэньня прэзыдэнтам РФ анэксіі чатырох украінскіх вобласьцяў. За некалькі дзён да вызваленьня Херсону ўкраінскай арміяй сьвятар уцёк разам з расейскімі вайскоўцамі на акупаваную тэрыторыю.
На тэрыторыі Ўсьпенскага сабору супрацоўнікі СБУ выявілі калекцыю абразоў, выкрадзеную вайскоўцамі РФ з дому ганаровага консула Літвы падчас акупацыі гораду расейскім войскам. У царкоўных памяшканьнях сабору СБУ выявіла расейскія пашпарты мясцовых сьвятароў, выдадзеныя ім падчас акупацыі гораду, і пропускі, выпісаныя на імя «фэдэральнага дарадцы вайскова-цывільнай адміністрацыі РФ».
Па гэтых фактах сьледчыя СБУ адкрылі крымінальныя справы паводле ч. 2 арт. 111 КК Украіны («дзяржаўная здрада, учыненая ва ўмовах ваеннага становішча»).
У япархіях Жытомірскай, Валынскай і Чаркаскай вобласьцяў СБУ выявіла сьцягі так званай «Наваросіі», прапагандысцкую літаратуру расейскіх аўтараў, тэксты малітваў «за Расею» і расейскія падручнікі, у якіх «усхваляецца крамлёўскі рэжым».
Усе сканфіскаваныя пры ператрусах матэрыялы адправілі на экспэртызу для наступных працэсуальных дзеяньняў.
