Аб гэтым Станіслаў Зась заявіў у эфіры тэлеканалу АНТ.
«Прысутнічаюць розныя формы гібрыднага ўзьдзеяньня: і чыста ваенныя, і санкцыйна-эканамічныя, і інфармацыйныя, і палітычныя ціскі — усё гэта ў комплексе. Я б сказаў, што не, ня ў поўнай меры зараз гатова АДКБ да такога кшталту супрацьдзеяньня».
Ён лічыць, што за 20 гадоў «адбылася вельмі моцная трансфармацыя»: АДКБ усё больш ператвараецца «ў комплексную пляцоўку для гарантаваньня бясьпекі нашых дзяржаў».
«Гэта ня толькі ваенныя пагрозы, гэта і пагрозы тэрарыстычнага характару, гэта і наркатрафік, гэта і злачыннасьць, у тым ліку ў сфэры інфармацыйна-камунікацыйных тэхналёгій. Мы яшчэ не гатовыя, але да гэтага мы ідзём», — мяркуе Зась.
Саміт АДКБ, які прайшоў у Ерэване, скончыўся 23 лістапада тым, што прэм’ер-міністар Армэніі Нікол Пашыньян адмовіўся падпісваць праекты дэклярацыі Рады калектыўнай бясьпекі АДКБ і дакумэнту аб сумесных мерах па аказаньні дапамогі Армэніі.
Ягоная краіна незадаволеная тым, што блёк ніяк не дапамог у змаганьні з Азэрбайджанам, больш за тое, назваў урад у Баку сяброўскім і заявіў, што памежны канфлікт дзьвюх дзяржаў ня справа АДКБ.
Прэс-сакратар Крамля Дзьмітрый Пяскоў, камэнтуючы вынікі саміту, сказаў, што пра выхад Армэніі з АДКБ размова, аднак, не ідзе.
