Пра гэта паведамляюць 1rnd.ru. Паводле выданьня, былы маёр паліцыі з Растова-на-Доне Сяргей Кадацкі, асуджаны на 15 гадоў калёніі за забойства жонкі і замах на цесьця, загінуў як удзельнік вайны на тэрыторыі акупаванай часткі Луганскай вобласьці. Яго пасьмяротна ўзнагародзілі мэдалём «За адвагу».
«Загінуў на полі бою, праявіўшы мужнасьць і адвагу», — гаворыцца ва ўказе аб узнагароджаньні, які падпісаў прызначаны Расеяй «кіраўнік» рэгіёну Леанід Пасечнік.
Сяргея Кадацкага асудзілі ў 2017 годзе пасьля таго, як ён расстраляў сваю жонку і цесьця на трасе Растоў — Таганрог з паляўнічай вінтоўкі. Жанчына памерла на месцы, а яе бацька змог выжыць пасьля цяжкіх агнястрэльных ранаў. Пазьней у СМІ зьявілася відэа з затрыманьнем Кадацкага, на якім ён кажа сілавікам: «Я ж мент таксама, вы чаго, б...».
