Прадстаўнікоў Польшчы на пахаваньні Эміля Чэчкі не было, як і ягоных сваякоў.
Цела паляка 1,5 месяца знаходзілася ў моргу. У праўладным праваабарончым цэнтры «Сыстэмная праваабарона» патлумачылі, што цела Эміля Чэчкі ў Польшчу не перадавалі: родныя ня выйшлі на сувязь, а польскае пасольства нібыта адмовілася ўзаемадзейнічаць. Пахаваньне арганізавала «Сыстэмная праваабарона».
25-гадовы Чэчка, які ўцёк у Беларусь 16 сьнежня, сьцьвярджаў, што нібыта на мяжы забілі сотні мігрантаў, а ў некаторых забойствах ён браў удзел асабіста. Гэтыя словы ў выніку не былі пацьверджаныя ніякімі доказамі. 21 сьнежня 2021 году Элізабэт Тросэл, афіцыйная прадстаўніца Офісу Вярхоўнага камісара ААН у правах чалавека, заявіла, што ААН ня мае зьвестак пра «масавыя пахаваньні мігрантаў» на мяжы Польшчы і Беларусі.
Апошні раз у публічнай прасторы Чэчку бачылі 16 сакавіка ў відэа, у якім ён заявіў, што за Ўкраіну ваююць «польскія фашысты». Сярод іншага ён сказаў пра размову з псыхолягам. У кадры таксама зьявіўся Дзьмітры Белякоў — кіраўнік створанага ўладамі пасьля разгрому праваабарончых арганізацый цэнтру «Сыстэмная праваабарона».
Тады Белякоў паведаміў, што Чэчка атрымаў пасьведчаньне аб рэгістрацыі хадайніцтва аб наданьні статусу ўцекача і атрыманьні дадатковай абароны тэрмінам на паўгода. Белякоў сказаў таксама, што Чэчка «актыўна сябе знаходзіць у звычайным беларускім цывільным жыцьці».
На наступны дзень Чэчку знайшлі павешаным па месцы пражываньня ў Менску пры нявысьветленых абставінах. Сьледчы камітэт тады абяцаў правесьці расьсьледаваньне, аднак за наступныя тыдні не было ніякіх паведамленьняў пра хаду сьледзтва.
