Кіраўнік амэрыканскай дыпляматыі і міністар абароны ЗША ў нядзелю наведалі Кіеў і выкарысталі першы візыт амэрыканскіх службовых асобаў ва Ўкраіну з пачатку расейскага ўварваньня два месяцы таму, каб абвясьціць пра паступовае вяртаньне амэрыканскіх дыпляматаў у краіну і прызначэньне новага пасла, паведамляе Голас Амэрыкі.
Дзяржсакратар Энтані Блінкен і міністар абароны Лойд Остын у суботу прыбылі ў Польшчу, а ў нядзелю прыехалі ва Ўкраіну па сушы, паведаміў высокапастаўлены супрацоўнік Дзярждэпартамэнту, адмовіўшыся абмяркоўваць дэталі паездкі і прынятыя меры бясьпекі.
Візыт быў закліканы прадэманстраваць падтрымку Ўкраіны Захадам, і члены амэрыканскага ўраду таксама паабяцалі новую дапамогу ў памеры 713 мільёнаў даляраў ураду Зяленскага і краінам рэгіёну, дзе расейскае ўварваньне выклікала асьцярогі новай агрэсіі з боку Масквы.
Ён таксама падкрэсьліў зьмены ў канфлікце пасьля таго, як украінскія сілы, якія атрымалі масавыя пастаўкі зброі з Захаду, пасьпяхова адбілі расейскі наступ на Кіеў.
Расейскія сілы перагрупаваліся з мэтай захопу новых тэрыторый на паўднёвым усходзе Ўкраіны. Гэта дазволіла замежным лідэрам наведаць сталіцу, а некаторым заходнім краінам аднавіць дыпляматычную прысутнасьць у апошнія тыдні, аднак Вашынгтон з асьцярожнасьцю ставіцца да вяртаньня сваіх дыпляматаў на фоне спарадычных расейскіх ракетных абстрэлаў на захадзе краіны.
Афіцыйныя асобы адхілілі просьбы СМІ суправаджаць Блінкена і Остына падчас іх візыту ва Ўкраіну зь меркаваньняў бясьпекі. Яны правялі брыфінг для журналістаў у Польшчы пры ўмове, што аб паездцы ня будзе паведамлена, пакуль дэлегацыя ня вернецца з Украіны.
Зяленскі абвясьціў аб візыце падчас прэс-канфэрэнцыі ў суботу. Па словах амэрыканскіх афіцыйных асобаў, яны былі гатовыя да такой непрадбачанай акалічнасьці, якая не сарвала візыту.
Чакалася, што Блінкен і Остын правядуць прыкладна паўтарагадзінную сустрэчу зь Зяленскім, міністрам замежных спраў Украіны Дзьмітром Кулебам, міністрам абароны Аляксеем Рэзьнікавым і іншымі афіцыйнымі асобамі.
Амэрыканскія дыпляматы пакінулі пасольства ў Кіеве прыкладна за два тыдні да расейскага ўварваньня 24 лютага, перадаўшы некаторыя функцыі ў Львоў перад канчатковым пераездам у Польшчу.
На гэтым тыдні дыпляматы пачнуць «аднадзённыя паездкі» ў Львоў, а чыноўнікі паскараюць складаньне плянаў вяртаньня ў Кіеў, паведаміў супрацоўнік Дзярждэпартамэнту.
Па словах супрацоўніка, у панядзелак прэзыдэнт ЗША Джо Байдэн афіцыйна прапануе дзейнага амбасадара ЗША ў Славакіі Брыджэт Брынк на пасаду амбасадара ва Ўкраіне. Гэта пасада была вакантнай больш за два гады.
Блінкен і Остын праінфармавалі Зяленскага аб новым вайсковым фінансаваньні Ўкраіны на суму звыш 322 мільёнаў долараў, у выніку чаго агульны аб’ём амэрыканскай дапамогі Ўкраіне ў сфэры бясьпекі з пачатку ўварваньня дасягнуў каля 3,7 мільярда даляраў, паведаміў супрацоўнік.
Каля 400 мільёнаў даляраў у выглядзе новай вайсковай дапамогі таксама будзе накіравана іншым краінам Цэнтральнай і Ўсходняй Эўропы, а таксама балканскім дзяржавам, паведаміў чыноўнік.
Напярэдадні візыту Блінкен размаўляў з генэральным сакратаром ААН Антонію Гутэрышам, каб скаардынаваць візыты кіраўніка ААН у Маскву і Кіеў, паведаміў чыноўнік.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
