Лінкі ўнівэрсальнага доступу

Пуцін прысвоіў 64-й брыгадзе званьне «гвардзейскай» за «масавы гераізм і адвагу». Ва Ўкраіне яе лічаць датычнай да забойстваў у Бучы


Целы пяцёх мужчын, знойдзеныя ў падвале дзіцячага санаторыю пасьля таго, як расейскія вайскоўцы пакінулі горад. Буча, Кіеўская вобласьць, 4 красавіка 2022 году
Целы пяцёх мужчын, знойдзеныя ў падвале дзіцячага санаторыю пасьля таго, як расейскія вайскоўцы пакінулі горад. Буча, Кіеўская вобласьць, 4 красавіка 2022 году

64-я брыгада дысьлякуецца ў Хабараўскам краі. Расейская служба Радыё Свабода піша, што ў вывучаных адкрытых крыніцах ёсьць ускосныя пацьверджаньні таго, што вайскоўцы брыгады сапраўды былі ў Бучы.

У Расеі 64-й асобнай мотастралковай брыгадзе Сухапутных войскаў прысвоена званьне «гвардзейская». Такі загад падпісаў Уладзімер Пуцін.

У дакумэнце зазначаецца, што званьне дадзена «за масавы гераізм і адвагу, стойкасьць і мужнасьць, праяўленыя асабовым складам брыгады ў баявых дзеяньнях па абароне Айчыны і дзяржаўных інтарэсаў ва ўмовах узброеных канфліктаў».

64-я брыгада дысьлякуецца ў Хабараўскам краі. Міністэрства абароны Ўкраіны абвінавачвала вайскоўцаў гэтай брыгады «ў зьдзяйсьненьні масавых забойстваў і катаваньняў мірнага насельніцтва ў Бучы».

Расейская служба Радыё Свабода піша, што ў вывучаных адкрытых крыніцах ёсьць ускосныя пацьверджаньні таго, што вайскоўцы гэтай брыгады сапраўды былі ў горадзе Бучы.

На пачатку красавіка журналісты і ўкраінскія ўлады паведамілі аб дзясятках загінулых людзей на вуліцах гораду Бучы на паўночны захад ад Кіева. Фатаздымкі загінулых у цывільным адзеньні, часам са зьвязанымі рукамі апублікавалі Reuters, УНІАН, AFP. Украінскія вайскоўцы тады зайшлі ў горад пасьля таго, як адтуль сышлі расейскія войскі.

The New York Times сьцьвярджае, што яе карэспандэнты вызначылі месца і час гібелі некалькіх дзясяткаў чалавек, а таксама паразмаўлялі са сьведкамі, якія пацьвердзілі, што жыхары Бучы сталі ахвярамі расейскіх вайскоўцаў.

Міністэрства абароны Расеі назвала фатаграфіі і відэаматэрыялы з забітымі мірнымі жыхарамі ў Бучы пад Кіевам «чарговай правакацыяй» і «пастаноўкай кіеўскага рэжыму для заходніх СМІ».

Вайна Расеі супраць Украіны

  • А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
  • Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
  • Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
  • 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
  • З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
  • Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
  • 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
  • У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
  • 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
  • У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
  • Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
  • Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG