На дзяржаўным тэлеканале АНТ раней распавялі падрабязнасьці прэтэнзій сілавікоў да брэнду Belaruskicry і пра затрыманьне аднаго з удзельнікаў каманды Ягора Бужылава, які прыехаў у Беларусь.
У сюжэце АНТ паказалі сярод іншага кадры, верагодна, зьнятыя на ўтоеную камэру. На іх было відаць, што чалавек знаходзіцца ў клетцы. Апроч гэтага, было заяўляецца, што яшчэ шэсьць чалавек у Беларусі мелі дачыненьне да Belaruskicry — іх вінавацяць у эканамічных злачынствах.
У сюжэце заяўляецца, што брэнд нібыта «фінансаваў экстрэмістаў і нават тэрарыстаў». Супрацоўнік сілавога ведамства, які застаўся за кадрам, цікавіўся ў затрыманага Бужылава, ці атрымлівалі «зваротную сувязь ад украінскага боку», а таксама запытваў пра сувязь з незалежнымі мэдыя.
У сюжэце назвалі іншых людзей, зьвязаных з брэндам, і паказалі кадры з іншымі нібыта «ўдзельнікамі схемы», якіх абвінавацілі ў незаконным прадпрымальніцтве і нясплаце падаткаў.
Юрысты: «Парушае прынцып прэзумпцыі невінаватасьці»
У Юрыдычнай службе «Вясны» адзначылі, што перадача прапагандыстам відэазапісу допыту Ягора Бужылава за кратамі парушае таямніцу папярэдняга расьсьледаваньня:
«Згодна з арт. 198 Крымінальна-працэсуальнага кодэкса папярэдняе расьсьледаваньне праводзіцца таемна. Апроч гэтага, утрыманьне ў клетцы і апублікаваньне відэа ў мэдыя парушае прынцып прэзумпцыі невінаватасьці і права на гуманнае абыходжаньне і павагу годнасьці, якая ўласьціва чалавечай асобе».
Юрысты «Вясны» заявілі з гэтай нагоды, што злачынства, у зьдзяйсьненьні якога абвінавачваецца адзін з заснавальнікаў Belaruskicry, не адносіцца да катэгорыі асабліва небясьпечных, чалавек не ўяўляе небясьпекі для супрацоўнікаў сілавых структур.
«Злачынства, у зьдзяйсьненні якога абвінавачваецца адзін з заснавальнікаў Belaruskicry, не адносіцца да катэгорыі асабліва небясьпечных. Чалавек не ўяўляе небясьпекі для супрацоўнікаў. Утрыманьне ў клетцы падчас допыту і апублікаваньне допыту ў мэдыя, па сюжэце якога можна выказаць здагадку, што абвінавачаны — асабліва небясьпечны злачынец, віна якога даказаная, парушае прынцып прэзумпцыі невінаватасьці і ўяўляе сабой бесчалавечнае і прыніжаючае годнасьць абыходжаньне (арт. 7 і 14 Міжнароднага пакта аб грамадзянскіх і палітычных правах)», — заявілі юрысты «Вясны».
23 ліпеня 2025 года суд Партызанскага раёну Менска прызнаў «экстрэмісцкімі матэрыяламі» сайт брэнду, а таксама старонкі ў Instagram, Telegram, Facebook, TikTok і «Х». На наступны дзень КДБ прызнаў брэнд «экстрэмісцкім фармаваньнем».
Пазьней стала вядома пра затрыманьне стваральніка ювэлірнага брэнду Belaruskicry Ягора Бужылава.
