Расейскае дыпляматычнае ведамства называе высланьне эўрапейскіх дыпляматаў «мерай у адказ на недружалюбныя дзеяньні Эўразьвязу». У пятніцу ў МЗС Расеі выклікалі кіраўніка прадстаўніцтва Эўрапейскага Зьвязу Маркуса Эдэрэра, дзе яму, як сьцьвярджаецца, быў выказаны рашучы пратэст. Расейскае дыпляматычнае ведамства заяўляе, што ЭЗ нясе адказнасьць за «пасьлядоўнае разбурэньне архітэктуры двухбаковага дыялёгу і супрацоўніцтва, якая стваралася дзесяцігодзьдзямі».
Раней стала вядома, што Паўночная Македонія высылае шэсьць расейскіх дыпляматаў. Як паведамляе МЗС краіны, яны былі ўцягнутыя ў дзейнасьць, супярэчную Венскай канвэнцыі аб дыпляматычных адносінах. Паслу Расеі ў Паўночнай Македоніі ўручылі адпаведную ноту.
З пачатку расейскага ўварваньня на тэрыторыю Ўкраіны ЗША і краіны Эўропы аб’явілі пэрсонамі нон грата некалькі сотняў расейскіх дыпляматаў. Высылка адбываецца на фоне паведамленьняў аб верагодных ваенных злачынствах і злачынствах супраць чалавечнасьці расейскай арміі ва ўкраінскіх гарадах і вёсках. Расея ўсе паведамленьні аб агрэсіі супраць мірных жыхароў катэгарычна адпрэчвае.
