«Мы заклікаем Злучаныя Штаты і іх саюзьнікаў спыніць безадказную мілітарызацыю Ўкраіны, якая прыводзіць да непрадказальных наступстваў для рэгіянальнай і міжнароднай бясьпекі», — цытуе выданьне ноту. Расея таксама папярэдзіла аб небясьпецы таго, што зброя трапіць у рукі ўкраінскіх экстрэмістаў, піша газэта.
The Washington Post мяркуе, што Масква накіравала ліст у адказ на новы пакет вайсковай дапамогі Кіеву ў памеры 800 мільёнаў даляраў. Пасольства Расеі ў ЗША перадало дакумэнт у Дзярждэпартамэнт.
Прадстаўнік Дзярждэпартамэнту ЗША Нэд Прайс заявіў, што «нішто не прымусіць» адміністрацыю Джо Байдэна адмовіцца ад падтрымкі Ўкраіны. Так ён адказаў на пытаньне CNN аб уплыве расейскай ноты з папярэджаньнем аб «наступствах» паставак зброі ва Ўкраіну.
Раней дзяржсакратар ЗША Энтані Блінкен у тэлефоннай размове з кіраўніком МЗС Украіны пацьвердзіў рашучасьць ЗША працягваць аказваць Кіеву ваенную, эканамічную і гуманітарную падтрымку.
- У сераду, 13 красавіка, стала вядома, што Пэнтагон вылучыў Украіне новую вайсковую дапамогу. Кіеў павінен атрымаць цяжкую артылерыю, бесьпілётнікі, супрацьтанкавыя ракеты, верталёты і іншае ўзбраеньне.
- Расейскае збройнае ўварваньне на тэрыторыю Ўкраіны пачалося 24 лютага на загад прэзыдэнта Ўладзіміра Пуціна. Кіеў абвінавачвае Маскву ў мэтанакіраваным забойстве мірных жыхароў і зьнішчэньні цывільнай інфраструктуры. Расейскі бок сьцьвярджае, што атакуе выключна вайсковыя абʼекты, а паведамленьні пра жорсткае абыходжаньне з цывільнымі асобамі называе фэйкамі.
- На фоне баявых дзеяньняў бакі вядуць перамовы аб урэгуляваньні сытуацыі, але вынікаў яны пакуль не далі.
