Мікіта працаваў у Нацыянальным мастацкім музэі ў Менску, улетку 2020 году яго звольнілі за верш, які ён апублікаваў у facebook.
25 сакавіка ў віншаваньні да Дня Волі на сваім сайце Мікіта Моніч паведаміў, што зьехаў з Беларусі.
«Чалавек адаптыўнейшы за любога іншага зьвера. І, раптам, 24-га лютага (пачатак нападу Расеі на Украіну). Нібы нейкі выбух, калі ад удару ўсё разьлятаецца. І гэтак жа сталі разьлятацца ўсе, хто можа. Мы самі сабраліся за суткі. На пустой вячэрняй мяжы стаіць на сьвятлафоры машына. Пад’язджаю ззаду, станаўлюся ў чаргу. Праз хвілін 10 сьвятло ўсё яшчэ чырвонае, ніякага руху, таму вырашаю спытаць у кіроўцы, што ды як. Падыходжу да машыны, кіроўца апускае шкло, і аказваецца, што гэта мой нязьдзейснены заказчык: дамаўляліся, што прачытаю лекцыю яго супрацоўніцам да 8 сакавіка. „Мабыць, цяпер не прачытаю“, — сумна сьмяемся мы. Запальваецца зялёнае сьвятло, мы праяжджаем на памежны кантроль», — расказаў Мікіта.
Мікіта Моніч зьбіраецца вяртацца ў Беларусь.
«Амаль у кожнага, хто з’ехаў, засталіся мэты і мары ў Беларусі. У кожнага, хто застаўся, былі і застаюцца мэты і мары ў Беларусі. Мне, напрыклад, яшчэ рабіць музэй дэкаратыўна-прыкладнога мастацтва ў Менску. Калі гэта адбудзецца? Я не ведаю. Але вельмі гэтага хачу», — піша Мікіта Моніч.
