Дарадца Офісу прэзыдэнта Ўкраіны Аляксей Арастовіч заявіў, што актыўная фаза вайны амаль завершана пад Кіевам, Харкавам, Сумамі і Чарнігавам.
«Нават калі яны дзесьці наскрабуць нейкія рэзэрвы, паспрабуюць перайсьці ў наступ, то ўсё роўна ўсё скончыцца іхнай паразай. Ну проста на тыдзень гэта ці на 10 дзён яшчэ зацягнецца», — напісаў Аляксей Арастовіч у сваім тэлеграм-канале.
«Канец тут адзін, яны стратэгічна прайгралі, прайграюць і апэратыўна. Мяркую, што сярэдзіна красавіка, канец красавіка — кіеўляне, якія зьехалі, змогуць вяртацца дадому», — дадаў Арастовіч.
Ваенныя дзеяньні Расеі супраць Украіны пачаліся 24 лютага. За гэты час загінулі тысячы чалавек з украінскага і расейскага бакоў, у тым ліку 109 дзяцей. Зруйнаваныя цэлыя гарады і шмат аб'ектаў інфраструктуры амаль ва ўсіх абласьцях Украіны, але асабліва ва ўсходніх, частка тэрыторыі Ўкраіны на Данбасе і ў Хэрсонскай вобласьці акупаваная, расейскія войскі ўзялі пад кантроль Запароскую АЭС і закрытую Чарнобыльскую АЭС. Атакі на Ўкраіну ідуць у тым ліку з тэрыторыі Беларусі.
Колькасьць уцекачоў з Украіны перавысіла 3 мільёны чалавек.
