Сябры ЭЗ узгаднілі новы пакет санкцый супраць Расеі

Паведамляецца, што часткай пакета стане адмена гандлёвага статусу Расеі як «нацыі найбольшага спрыяньня». Гэты крок можа дазволіць ЭЗ забараніць расейскія тавары або ўвесьці на іх санкцыі і паставіць Расею ў адзін шэраг з Паўночнай Карэяй або Іранам.

Дыпляматы заявілі, што санкцыі будуць уключаць забарону на імпарт расейскай сталі і жалеза, забарону на экспарт прадметаў раскошы, у тым ліку аўтамабіляў на суму больш як 50 000 эўра (55 000 даляраў), а таксама забарону на інвэстыцыі ў нафтавыя кампаніі і энэргетычны сэктар.

Уладальнік футбольнага клюба «Чэлсі» Раман Абрамовіч і яшчэ 14 чалавек таксама будуць дададзены ў сьпіс расейскіх алігархаў-мільярдэраў, супраць якіх будуць ужытыя санкцыі ЭЗ, паведамілі дыпляматы.

На мінулым тыдні Вялікая Брытанія ўвяла супраць Абрамовіча санкцыі ў выглядзе замарожваньня актываў і забароны на выезд. Нядаўна часопіс Forbes ацаніў актывы і маёмасьць Абрамовіча ў 7,2 мільярда даляраў.

Старшыня Эўракамісіі Урзуля фон дэр Ляен заявіла, што гэты пакет таксама заблякуе доступ Расеі да Міжнароднага валютнага фонду (МВФ) і Сусьветнага банку.

Апошнія санкцыі будуць афіцыйна ўведзеныя ў дзеяньне пасьля іх публікацыі ў Афіцыйным часопісе ЭЗ. На думку францускага старшынёўства, гэта павінна адбыцца «хутка».

Як паведамляе карэспандэнт Радыё Свабода, рашэньне можа быць апублікавана заўтра, 15 сакавіка.