Аўкцыён на аўтамабіль Бабарыкі
Аўтамабіль асуджанага на 14 гадоў калёніі ўзмоцненага рэжыму Віктара Бабарыкі выставілі на аўкцыён на пляцоўцы «БелЮрЗабесьпячэньне». Ford Fiesta 2015 году прадаюць з пачатковай цаной 17 тысяч рублёў. Таргі павінны адбыцца 2 сьнежня.
Паводле прысуду, на Бабарыку накладзены штраф 5000 базавых велічыняў. Таксама з палітвязьня спагналі звыш 47 мільёнаў рублёў у даход дзяржавы.
5 новых палітвязьняў
Палітвязьнямі прызналі яшчэ пяцёх зьняволеных: гэта Ірына Пярцова, Павал Сакалоў, Кацярына Макарэвіч, Юлія Лабунова і Арцём Латышаў. Іх перасьлед прызнаны праваабаронцамі палітычна матываваным.
Ірына Пярцова, Юлія Лабунова, Арцём Латышаў прыцягнутыя да адказнасьці і зьмешчаныя пад варту паводле ч. 2 арт. 339 КК (Хуліганства) за пэрформанс, падчас якога на надмагільным крыжы замацавалі таблічку з надпісам «Лукашэнка Аляксандар Рыгоравіч 30.08.1954–30.08.2021» і партрэт Лукашэнкі А.Р. з чорнай стужкай, адкаркавалі бутэльку шампанскага і вылілі зьмесьціва на паверхню магілы.
