Адам Міхнік расказаў Свабодзе пра сваё стаўленьне да рэжыму Аляксандра Лукашэнкі, пра цану свабоды, пра тое, як пратэсты беларусаў уразілі ўвесь сьвет, і пра сваю павагу да людзей, якія не здаюцца ў турмах.
Што сказаў Міхнік, цытаты:
- Утрымаць уладу Лукашэнку дапамог Пуцін.
- Беларусы самі сабе дапамогуць, а іх саюзьнікам будзе расейская дэмакратыя.
- Так, як нам дапамагла Перабудова, так беларусам дапаможа тое, што адбудзецца ў Расеі насуперак дыктатуры Пуціна.
- Цяпер у Беларусі існуе фактычна адзіны бандыцкі рэжым у Эўропе.
- Заўсёды прыходзіць такі момант, калі «кропля перапаўняе чашу». Масавыя акцыі пратэсту беларусаў, якія ўразілі ўвесь сьвет, не забудуцца і потым вернуцца наступнай хваляй.
- Як аднойчы сказаў нам тут, у Польшчы, Ян Павал II: «Ня трэба хацець такой свабоды, якая нічога б не каштавала». Свабода заўсёды мае сваю цану, і часта яна вельмі высокая.
- Не магу кінуць камень у тых людзей, якіх зламала турма, бо паважаю іх за тое, што яны вырашылі зрабіць такія ўчынкі, якія прывялі іх у турму.
- Але, вядома, самую вялікую павагу я маю для тых, каго турма не зламала. Такія людзі — як агні ў цёмным тунэлі. Яны паказваюць нам, што так можна жыць, што такое жыцьцё мае сэнс, бо яны даюць нам надзею на будучыню.
