8 траўня ў менскім гандлёвым цэнтры «Экспабел» пачалі рабіць усім ахвотным прышчэпкі ад COVID-19. Аднак ужо 19 траўня пункт вакцынацыі закрыюць. Так вырашылі мэдыкі, піша Tut.by.
Плянавалася, што пункт у «Экспабеле», падрыхтаваны да працы мэдпэрсаналу за кошт самога гандлёвага цэнтру, будзе працаваць штодня з 10 раніцы да 9 вечара і прыме ўсіх, хто з розных прычынаў ня можа вакцынавацца ў сваёй паліклініцы. Ад мэдыкаў Менскай цэнтральнай раённай клінічнай лякарні залежалі пастаўкі вакцыны і мэдычнае суправаджэньне працэсу.
Адкрыцьцё цэнтру вакцынацыі выклікала ажыятаж, і тады дзеля зручнасьці ў ім арганізавалі папярэдні запіс замест жывой чаргі. Аднак цяпер у запісе адмаўляюць: ахвотных адпраўляюць на прышчэпку ў паліклінікі па месцы жыхарства.
Працэдура вакцынацыі, паводле мэдыкаў, «патрабуе адмысловых умоў, якія могуць быць забясьпечаны толькі ў мэдыцынскіх установах».
Да 18 траўня ў «Экспабеле» зробяць прышчэпкі тым, хто пасьпеў запісацца, а таксама тым, каму трэба ўвесьці другую дозу.
Раней пра намеры адкрыць пункты вакцынацыі заяўлялі чыноўнікі некалькіх раёнаў Менску, у прыватнасьці, Савецкага і Заводзкага.
