Пра гэта паведамляе Bloomberg са спасылкай на высокапастаўленых эўрапейскіх чыноўнікаў. Паводле іх зьвестак, затрымка паставак прэпарату зьвязаная з тым, што Паўночная Македонія стала адной з трох балканскіх краін, якія асудзілі перасьлед расейскага апазыцыйнага палітыка Аляксея Навальнага.
У студзені ўлады Паўночнай Македоніі падпісалі дэклярацыю з асуджэньнем арышту Навальнага, а ў сакавіку выступілі ў падтрымку ўвядзеньня санкцый у дачыненьні да расейскіх чыноўнікаў за парушэньні правоў чалавека.
Адзін з чыноўнікаў ураду Паўночнай Македоніі паведаміў Bloomberg, што афіцыйна Расея заявіла, што затрымкі ў пастаўках зьвязаныя з вытворчасьцю вакцыны і высокім попытам на яе. Аднак высокапастаўлены дыплямат ЭЗ сьцьвярджае, што рашэньне наўпрост зьвязанае з падтрымкай Паўночнай Македоніяй дзеяньняў, якія сталі адказам на арышт Навальнага.
У Расейскім фондзе прамых інвэстыцый заявілі, што пастаўкі ў Паўночную Македонію ідуць у адпаведнасьці з кантрактам.
«Няма ніякай палітыкі, калі гаворка заходзіць аб супрацоўніцтве ў галіне вакцын. Здагадкі пра тое, што палітыка адыгрывае пэўную ролю ў пастаўках „Спутника V “, зусім ня слушныя», — гаворыцца ў заяве арганізацыі.
Агулам Паўночная Македонія павінна атрымаць 200 тысяч доз вакцыны «Спутник V». Акрамя расейскага прэпарату Паўночная Македонія закупіла вакцыны ад Pfizer і кітайскай кампаніі Sinopharm.
