На гэтым тыдні вакцына будзе адпраўлена ў шэраг эўрапейскіх краін, у некаторых ужо пачаліся першыя вакцынацыі ад каранавірусу.
Сьвятлана Ціханоўская ў сваім тэлеграм-канале заявіла, што рэальна арганізаваць пастаўку партыі прышчэпак для беларускіх мэдыкаў. Вакцыну можна паставіць як арыгінальную зь Нямеччыны, так і вырабленую ў Літве ці Польшчы паводле рэцэптуры кампаніі Pfizer.
16 сьнежня пытаньне абмяркоўвалася на сустрэчы з эўракамісарам Олівэрам Вархелі. Цяперашні бюджэт Эўразьвязу на дапамогу Беларусі дазваляе арганізаваць такія пастаўкі. Беларускія ўлады ўжо закупляюць вакцыну расейскай вытворчасьці, аднак пры згодзе афіцыйнага Менска і спэцыялісты, і шараговыя грамадзяне атрымаюць права выбару.
«Трэба дапамагчы тым, хто ў першую чаргу пакутуе ад каранавірусу ды безадказнай палітыкі Лукашэнкі і яго чыноўнікаў адносна пандэміі. Для нас важна жыцьцё кожнага чалавека, тых, хто на перадавой змагаецца з хваробай. Калі дзяржава не выконвае сваіх абавязаньняў, мы гатовыя браць адказнасьць у свае рукі і рабіць усё, што дапаможа выратаваць тысячы беларусаў», — адзначыла Сьвятлана Ціханоўская.
