Юрыя затрымалі падчас акцыі людзей з інваліднасьцю 3 сьнежня, у Міжнародны дзень людзей з інваліднасьцю.
«Мы сабраліся насупраць парку Чалюскінцаў у сквэры, размаўлялі, елі печыва, нават плякатаў не было ніякіх. Стаялі супрацоўнікі ДАІ, каб нікога не падвезьлі туды, стаяла з аднаго боку 5-6 бусаў, зь іншага — 7 ці 8. Міліцыянты сказалі, што прайсьці нам не дадуць. Мы тады сказалі, што пастаім на месцы, але нам і гэта забаранілі і папрасілі ісьці па адным да плошчы Якуба Коласа», — прыгадвае Юры.
На акцыю ён вырашыў пайсьці ўпершыню, бо «у краіне не працуюць законы, а толькі ўказы».
«У нас у краіне несправядлівасьць, законы не працуюць, у абыход Канстытуцыі прымаюцца папраўкі, указы, дэкрэты. Мне падабалася Канстытуцыя, якая была раней. А ў нас захацелі — павялічылі пэнсійны ўзрост, захацелі — яшчэ нешта зрабілі», — тлумачыць Юры.
Урэшце ўсіх па адным забралі ў бусікі і адвезьлі ў РУУС, расказвае ён. Там аформілі пратаколы, і на наступны дзень праз скайп адбыўся суд.
«Ніхто не стаў нас слухаць, як і што было. У мяне абмежаванае перасоўваньне, я папрасіў даслаць мне дадому рашэньне суду. Далі штраф — 20 базавых», — расказвае Юрый.
«У пракуратуры прачыталі лекцыю»
Пасьля Юрыя выклікалі ў пракуратуру. Ён кажа, што гэта было падобна да лекцыі — каб ён больш ня ўдзельнічаў ні ў якіх акцыях.
«Мне расказалі, як гэта няправільна — хадзіць на маршы. Як дрэнна, што я не паважаю дзяржаву, выказваю сваю думку. Сказалі, што калі не перастану хадзіць, то будуць праблемы: сьпярша буду плаціць штрафы, пасьля можа быць крымінальная справа. Расказалі, якія ёсьць артыкулы і што за гэта бывае. Такая сабе лекцыя», — прыгадвае Юры.
Калі ён выходзіў з пракуратуры, заўважыў, што ў чарзе на падобную гутарку стаялі яшчэ чалавек 15.
«Такія выклікі — масавая зьява»
Каардынатар Офісу правоў людзей з інваліднасьцю Сяргей Драздоўскі заўважае, што 3 сьнежня ва ўсім сьвеце адзначаюць Дзень людзей з інваліднасьцю, і акурат у гэты дзень прынята праводзіць нейкія акцыі.
«Гэты дзень для таго, каб людзі з інваліднасьцю сталі заўважныя, а ў выніку людзей затрымалі. Людзі проста знаходзіліся на вуліцы, іх затрымалі і абвінавацілі, што яны былі ўдзельнікамі акцыі. Гэтыя гутаркі цяпер — масавая зьява. Па тэлефоне не тлумачаць, навошта трэба прыходзіць. Чалавек ня можа вызначыць, хто яму тэлефануе. Фактычна гэта запужваньне», — тлумачыць Сяргей Драздоўскі.
Сяргей Драздоўскі зазначае, што «калі б у краіне працавала права, то такая гутарка нічога б ня значыла».
«Але я не выключаю, што ў нас гэта скарыстаюць супраць чалавека: маўляў, мы праводзілі ўжо зь ім гутарку. Могуць павялічыць штрафы», — кажа Сяргей Драздоўскі.
У Менску акцыя людзей з інваліднасьцю ўжо стала традыцыйнай. Перш людзі зьбіраліся ля Чырвонага касьцёлу, пасьля перамясьціліся да парку Чалюскінцаў. Апошнія разы сілавікі проста не даюць ім сабрацца.
