Уладзімір Пуцін папрасіў у прэзыдэнта Францыі Эманюэля Макрона дапамогі ў вытворчасьці расейскай вакцыны ад каранавірусу «Спутник V».
Пра гэта піша францускае выданьне Challenges са спасылкай на дыпляматычную крыніцу. Паводле інфармацыі выданьня, падчас тэлефоннай размовы з Макронам 7 лістапада Пуцін сказаў, што неабходна наладзіць супрацоўніцтва паміж расейскімі структурамі і парыскім інстытутам Пастэра для вытворчасьці прэпарата.
Макрон папрасіў расейскага прэзыдэнта даць яму час для адказу, каб абмеркаваць гэтае пытаньне з навукоўцамі. Паводле суразмоўцы выданьня, расейскі бок ужо некалькі тыдняў прапануе сумесную працу над вытворчасьцю вакцыны ад COVID-19. «Гэта адлюстроўвае іх галоўную слабасьць: адсутнасьць вытворчых магутнасьцяў», — лічыць крыніца.
Раней выданьне The Bell пісала, што, насуперак абяцаньням чыноўнікаў, што ў Расеі да канца году пачнецца масавая вакцынацыя насельніцтва, ніводзін вытворца вакцыны не гатовы яе забясьпечыць. Асноўная праблема ў тым, што для масавай вытворчасьці вакцыны трэба наладзіць працэс яе стварэньня ў біярэактарах вялікага аб’ёму, з чым узьніклі складанасьці.
4 лістапада блізкі да адміністрацыі Лукашэнкі тэлеграм-канал «Пул первого» паведамляў, што Лукашэнка і Пуцін праз тэлефон, сярод іншага, абмеркавалі «арганізацыю вытворчасьці вакцыны ў Беларусі з выкарыстаньнем расейскіх тэхналёгій і тэхналягічнага працэсу (Лукашэнка прапанаваў — Пуцін падтрымаў)». Аднак пасьля гэтай размовы Пуцін зьвярнуўся па дапамогу да Макрона.
Расейская вакцына ад COVID-19, распрацаваная Цэнтрам Гамалеі Міністэрства аховы здароўя Расеі, была афіцыйна зарэгістраваная 11 жніўня, стаўшы першай зарэгістраванай вакцынай ад каранавірусу новага тыпу ў сьвеце. Пры гэтым да моманту рэгістрацыі яна прайшла толькі 2 фазы клінічных выпрабаваньняў, гэта значыць была выпрабаваная на некалькіх дзясятках людзей. Пазьней высьветлілася, што некаторыя ўдзельнікі выпрабаваньняў расейскай вакцыны «Спутник V» атрымалі станоўчы вынік тэсту на каранавірусную інфэкцыю.
