Цягам трох дзён Расея і Беларусь абмяняюцца візытамі чыноўнікаў высокага рангу.
2 верасьня ў Маскву выправіўся кіраўнік МЗС Беларусі Ўладзімер Макей. У размове са сваім калегам Сяргеем Лаўровым ён заявіў, што ўлады краіны «не дазволілі рэалізаваць ўкраінскі сцэнар каляровай рэвалюцыі звонку».
«Сёньня нам даводзіцца адказваць як на ўнутраныя, так і на вонкавыя выклікі. Прычым апошняе ў большай ступені перадвызначае першае. Хачу сказаць, што мы вытрымалі першы націск і не дазволілі ў у Беларусі ўкраінскі сцэнар — сцэнар каляровай рэвалюцыі, арганізаванай звонку», — запэўніў Макей міністра замежных спраў Расеі.
3 верасьня ў Менску чакаюць расейскага прэм’ер-міністра Міхаіла Мішусьціна. Пра гэта паведаміў Сяргей Лаўроў. Мэта і дэталі візыту пакуль невядомыя, але чакаецца, што таксама будуць абмяркоўвацца падзеі ў Беларусі і пляны паглыбленьня інтэграцыі.
4 верасьня курс на Маскву возьме міністар абароны Беларусі Віктар Хрэнін. На сумесным паседжаньні кіраўнікоў абаронных ведамстваў дзяржаў – удзельніц АДКБ генэрал-маёр выступіць з дакладам «Аб міжнароднай і рэгіянальнай бясьпецы, кансалідацыі намаганьняў у прадухіленьні пагрозы разьвязваньня войнаў і ўзброеных канфліктаў».
Раней Хрэнін заяўляў, што армія «не дазволіць дэстабілізаваць сытуацыю ў Беларусі і застанецца з прэзыдэнтам».
