У Горадні на плошчы Леніна прайшоў мітынг пратэстоўцаў без электрычнасьці і жывой трансьляцыі.
Улады не далі мітынгоўцам электрычнасьці і гуку, як абяцалі раней. Дзяржаўнае тэлебачаньне не вяло жывой трансьляцыі, як у папярэднія дні.
Сабралася каля пяці тысяч чалавек зь бел-чырвона-белымі сьцягамі, работнікі прадпрыемстваў. Мітынгоўцы скандавалі: «Лукашэнка, сыходзь», «Жыве Беларусь», «Верым, можам, пераможам».
На самым пачатку каля пастамэнту помніка Леніну зьявіўся мужчына, які крычаў: «Лукашэнка, Лукашэнка». Людзі расступіліся вакол яго.
Потым на плошчы зьявілася некалькі міліцыянтаў, нікога не затрымалі і сышлі.
За гарвыканкамам побач зь мітынгам стаялі некалькі міліцэйскіх машын, за дзьвярыма ў будынку гарвыканкаму былі відаць амапаўцы ў чорнай форме. Да людзей яны не выходзілі.
Прывезьлі мэгафон. Працаваў свабодны мікрафон. Людзі абураліся сытуацыяй у краіне, заклікалі да забастоўкі.
Мітынг ішоў каля гадзіны. Пасьля гэтага адзін з выступоўцаў прапанаваў людзям прыйсьці на наступны дзень а 19 гадзіне. Людзі хутка разышліся. Затрыманьняў не было відаць.
