На анархіста Паліенку перадумалі заводзіць крымінальную справу за «абразу міліцыянта». Будзе адміністрацыйная

Анархіст Зьміцер Паліенка 25 ліпеня выйшаў на волю пасьля 15 сутак арышту, якія яму прысудзілі за выказваньні ў Facebook у падтрымку палітвязьняў. У той жа дзень стала вядома, што замест крымінальнай справы за «абразу міліцыянта» супраць яго будзе толькі адміністрацыйная.

Зьміцер Паліенка атрымаў пастанову аб адмове заводзіць крымінальную справу ад першага намесьніка начальніка берасьцейскага абласнога УУС Ігара Жыгалава.

Актывіста дапытвалі ў межах крымінальнай справы за абразу апэратыўніка Б. Дзьмітрука — сьцьвярджаецца, што Паліенка напісаў яму тры паведамленьні «ЎКантакце» пасьля брутальных затрыманьняў пратэстоўцаў і журналістаў у Ганцавічах.

ГЛЯДЗІЦЕ ТАКСАМА:

Галоўны рэдактар «Ганцавіцкага часу» расказаў пра зьбіцьцё журналістаў міліцыяй

Лінгвістычная экспэртыза, як паведамляюць, выявіла, што ў паведамленьнях Паліенка даваў нэгатыўную ацэнку асобы, было «наўмыснае прыніжэньне гонару і годнасьці асобы, выказанае ў непрыстойнай форме». Аднак паведамленьні былі асабістымі, а не публічнымі, таму справу паводле арт. 189 КК ня сталі заводзіць, а завялі паводле арт. 9.3 КаАП.

Паводле арт. 189 КК маглі пакараць штрафам, папраўчымі работамі на тэрмін да 2 гадоў, арыштам або абмежаваньнем волі на тэрмін да 3 гадоў. Паводле арт. 9.3 КаАП жа могуць пакараць толькі штрафам да 20 базавых велічыняў (540 рублёў).

ГЛЯДЗІЦЕ ТАКСАМА:

Анархіст Паліенка выйшаў на волю пасьля сухой галадоўкі. Міліцыя сьцьвярджае, што ён не галадаў

Сталі сьведкам падзеі? Зьнялі эксклюзіўнае фота ці відэа? Дасылайце ў Тэлеграм нашаму рэдактару

@SvabodaBelarus Ананімнасьць гарантуем

Што важна ведаць пра справу Паліенкі

Зьмітра Паліенку затрымалі 20 сакавіка за тое, што ён распыліў газавы балёнчык у твар мужчыну, які нібыта зрабіў яму заўвагу за курэньне на лесьвічнай пляцоўцы (сам Паліенка казаў, што скарыстаў балёнчык у мэтах самаабароны — толькі тады, калі на яго напаў п'яны мужчына).

Пазьней сьледчыя прадʼявілі яму яшчэ некалькі крымінальных абвінавачаньняў:

• «Псаваньне маёмасьці ў грамадзкім месцы» — за графіці на Ахоцкай вуліцы ў Менску (арт. 341).
• «Публічная абраза прадстаўніка ўлады ў сувязі з выкананьнем ім службовых абавязкаў» — за словы на адрас былога міністра ўнутраных спраў Ігара Шуневіча (арт. 369).
• «Асабліва злоснае хуліганства» — за графіці «Міліцыянты забіваюць людзей» на будынку ў Заводзкім раёне Менску (ч. 3 арт. 339).
• «Распальваньне сацыяльнай варожасьці» (ч. 1 арт. 130).