Старшыня партыі «Грамада» і кандыдат у прэзыдэнты Сяргей Чэрачань 16 ліпеня апублікаваў сваю перадвыбарчую праграму.
Чэрачань апублікаваў сваю праграму першым зь пяці кандыдатаў у прэзыдэнты.
Асноўныя тэзісы:
- Увесьці мясцовае самакіраваньне для разьвіцьця рэгіёнаў;
- Стварыць умовы для разьвіцьця малога і сярэдняга бізнэсу (правесьці «сумленную і празрыстую прыватызацыю»);
- Разьвіваць нацыянальныя каштоўнасьці і самаідэнтычнасьць (вярнуць бел-чырвона-белы сьцяг, падтрымліваць беларускую мову і карыстацца расейскай, выйсьці з АДКБ і не ўваходзіць у NATO);
- Адкрыць Беларусь для сьвету і сьвет для Беларусі;
- Стварыць камфортнае асяродзьдзе для жыцьця беларусаў (адмяніць тэрміновую службу ў войску і разьмеркаваньне пасьля ўнівэрсытэтаў і каледжаў, зьменшыць падаткі);
- Прыбраць тое, што перашкаджае беларусам жыць і працаваць (адмяніць «падатак на дармаедаў», транспартны падатак і абавязковае разьмеркаваньне, увесьці мараторый на сьмяротнае пакараньне);
- Вярнуць беларусам падтрымку і абарону дзяржавы;
- Зрабіць дзяржаву абслуговым сэрвісам для грамадзян.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
