Былая дэпутатка Палаты прадстаўнікоў Ганна Канапацкая будзе вылучацца на кандыдата ў прэзыдэнты Беларусі. Пра гэта яна заявіла 12 траўня падчас прэс-канфэрэнцыі ў менскім «Прэзыдэнт-гатэлі».
У імпрэзе бралі палітык Ігар Лялькоў, сястра Ганны Дар’я і бізнэсовец Вадзім Чарнышоў.
У залі быў плякат «Я зраблю!», які адлюстроўвае галоўную мэту патэнцыйнай кандыдаткі.
Яна заявіла, што канчатковае рашэньне пра ўдзел у выбарах будзе прымацца, сярод іншага, залежна ад разгляду ў Канстытуцыйным судзе яе звароту пра неканстытуцыйнасьць прызначэньня прэзыдэнцкіх выбараў цяперашнім нелегітымным, на яе думку, складам Палаты прадстаўнікоў. Яна сказала, што накіроўвае адпаведны зварот у Палату прадстаўнікоў.
Канапацкая заявіла, што не зьяўляецца ні спойлерам, ні спарынг-партнэрам, ні прадстаўніком дзейнай улады.
«У нас ёсьць каманда і каля тысячы чалавек у ініцыятыўнай групе», — паведаміла Канапацкая.
На прэс-канфэрэнцыю яна запрасіла журналістаў, блогераў, палітычных аглядальнікаў.
Напярэдадні Ганна Канапацкая разьмясьціла ў сваім тэлеграм-канале паведамленьне «Прывід канстытуцыйнага крызісу». У ім яна сьцьвярджае, што 9 жніўня 2020 году Рэспубліка Беларусь «можа застацца бяз дзьвюх галін дзяржаўнай улады. Усе нашы суседзі напружаныя. У NATO і Генштабе РФ падрыхтоўка. Увесь сьвет замер у чаканьні драматычнай разьвязкі».
Пра што гаварыла Ганна Канапацкая на прэсавай канфэрэнцыі:
- што лічбы пра інфікаваных і памерлых у Беларусі выклікаюць занепакоенасьць;
- выказала падтрымку і спачуваньне беларусам, сваякоў якіх не пашкадавала хвароба;
- выступіла за стварэньне прававой дзяржавы, у якой кожнаму грамадзяніну гарантуецца роўнасьць перад законам, незалежна ад яго сацыяльнага статусу, узросту, полу, палітычных і рэлігійных поглядаў, жыцьцёвых перакананьняў і каштоўнасьцяў;
- што хоча, каб «нашы дзеці не зьяжджалі вучыцца за мяжу, а калі і ехалі, то абавязкова вярталіся назад»;
- што мае намер стварыць умовы камфортнай працы для пэдагогаў, лекараў.
Прэзыдэнцкія выбары ў Беларусі прызначылі на 9 жніўня, падаць дакумэнты на рэгістрацыю ініцыятыўнай групы трэба да 15 траўня, а сабраць 100 тысяч подпісаў, неабходных для рэгістрацыі кандыдатам, да 20 чэрвеня.
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
