Прэзыдэнт Ірана Хасан Рухані пацьвердзіў, што іранскія вайскоўцы праз памылку зьбілі пасажырскі Boeing 737 «Міжнародных авіялініяў Украіны». Ён заявіў, што распарадзіўся знайсьці вінаватых у гэтай трагедыі.
«У атмасфэры пагрозаў і запалохваньня з боку агрэсіўнага амэрыканскага рэжыму іранскай нацыі пасьля пакутніцкай сьмерці генэрала Касэма Сулеймані і для абароны ад магчымых нападаў амэрыканскай арміі Ўзброеныя сілы Ірану былі прыведзеныя ў стан поўнай баявой гатоўнасьці, што, на жаль, прывяло да гэтай жудаснай катастрофы, якая забрала жыцьці дзясяткаў нявінных людзей», — гаворыцца ў заяве прэзыдэнта Ірану.
Рухані выказаў глыбокія спачуваньні блізкім загінулых. Ён таксама заявіў, што даручыў прыняць усе неабходныя захады для кампэнсацыі іхным сем'ям.
«Міністэрства замежных справаў будзе ажыцьцяўляць поўнае консульскае супрацоўніцтва з мэтай выяўленьня і вяртаньня целаў загінулых у іхныя семʼі», — адзначыў Рухані.
«Таксама неабходна зьліквідаваць усе слабыя моманты комплексаў супрацьпаветранай абароны, прыняць неабходныя захады, каб ніколі такія катастрофы не паўтараліся», — сказаў прэзыдэнт.
9 студзеня ва Ўкраіне заявілі, што сярод вэрсіяў катастрофы — паражэньне самалёта ракетай, выпушчанай зэнітна-ракетным комплексам «Тор-М1» расейскай вытворчасьці. Ён знаходзіцца на ўзбраеньні войска Ірану.
Самалёт Boeing 737-800 NG украінскай кампаніі МАУ, які накіроўвася ў Кіеў, пацярпеў катастрофу каля аэрапорту ў Тэгеране 8 студзеня. Загінулі 176 чалавек.
Крушэньне ўкраінскага самалёту ў Іране. Што трэба ведаць
- Самалёт Boeing 737-800 NG (рэйс PS752, рэгістрацыйны нумар UR-PSR) вылецеў каля 6:10 8 студзеня маршрутам Тэгеран — Кіеў, зьнік з радараў празь некалькі хвілінаў пасьля ўзьлёту.
- Усе на борце загінулі. На борце было 167 пасажыраў, а таксама 9 чальцоў экіпажу. Авіякампанія МАУ апублікавала сьпісы загінулых пасажыраў і чальцоў экіпажу.
- Сярод загінулых у катастрофе было найбольш грамадзян Ірану (82 чалавекі) і Канады (63 чалавекі), а таксама 11 грамадзян Украіны (2 пасажыры і 9 чальцоў экіпажу), 10 грамадзян Швэцыі, 4 — Аўганістану, 3 — Нямеччыны і 3 — Вялікай Брытаніі, паведаміў міністар замежных спраў Украіны Вадзім Прыстайка.
- Самалёт быў выраблены ў 2016 годзе, атрыманы МАУ непасрэдна з заводу Boeing, апошні раз прайшоў плянавае тэхнічнае абслугоўваньне 6 студзеня 2020 году. МАУ заяўляе, што гарантуе спраўнасьць сваіх самалётаў і высокую кваліфікацыю пілётаў.
- Паводле першай рэакцыі іранскага боку, самалёт разьбіўся з тэхнічных прычынаў, якія прывялі да аварыі рухавіка.
- 11 студзеня, праз 3 дні пасьля катастрофы, прэзыдэнт Ірана Хасан Роўхані прызнаў, што іранскія вайскоўцы па памылцы зьбілі пасажырскі Boeing 737 «Міжнародных авіяліній Украіны». Ён распарадзіўся знайсьці вінаватых у гэтай трагедыі.
- Камандуючы ваенна-касьмічнымі сіламі Ірана Амір Алі Хаджызадэ паведаміў, што апэратар супрацьпаветранай абароны Ірану самастойна вырашыў выпусьціць крылатую ракету па самалёце, ня здолеўшы звязацца з камандаваньнем.
