Жыхары Ліды (Горадзенская вобласьць) далучылася ў выходныя да акцый супраць інтэграцыі з Расеяй. Каля дзесяці маладых людзей мітынгавалі ў цэнтры гораду ўвечары 22 сьнежня.
Удзельнік акцыі Ільля Шаблінскі расказаў Свабодзе, што мітынг пачаўся каля помніка князю Гедзіміну, які нядаўна паставілі паблізу лідзкага замка. Маладыя людзі стаялі зь бел-чырвона-белымі сьцягамі на плячах. Адзін зь іх трымаў плякат «Belarus is not Russia» («Беларусь не Расея»). Потым кампанія перайшла на плошчу Леніна, да галоўнай гарадзкой ялінкі.
Па словах Ільлі, многія людзі рэагавалі пазытыўна, падыходзілі зрабіць сумеснае фота, пыталіся пра сэнс акцыі. Іншыя хваляваліся, што беларусы ня здолеюць пражыць бяз танных расейскіх газу і нафты.
«Мы адказвалі, што ня хочам быць Расеяй, што нам неабыякавая нашая незалежнасьць... Тлумачылі на прыкладзе Ўкраіны, што там лепей за нас жывуць, нармальна і без Расеі», — кажа Ільля.
Ён адзіны паўналетні сярод усіх удзельнікаў акцыі. Яму 18 гадоў, працуе афіцыянтам. Астатнія — школьнікі і навучэнцы гімназіі, ім па 16-17.
«Нам яшчэ жыць у гэтай краіне. Трэба нешта рабіць. Калі ўсе будуць сядзець дома і маўчаць; як звычайна, абмяркоўваць дома на кухні, то нічога ня зьменіцца», — упэўнены Ільля.
Акцыя працягнулася дзьве гадзіны. Калі пад’ехала міліцыя, хлопцы сышлі. Нікога зь іх не затрымалі.
Акцыі за незалежнасьць Беларусі пачаліся 7-8 сьнежня ў Менску. Яны прайшлі таксама ў Горадні, Пінску, Воршы. Беларусы замежжа мітынгавалі ў Кракаве, Шчэціне, Львове, Празе, Нью-Ёрку, Таронта, Будапэшце.
«Паглыбленьне інтэграцыі» Беларусі і Расеі. Што важна ведаць
- Урады Беларусі і Расеі зьбіраліся ўзгадніць 31 стратэгічны плян інтэграцыі. Паволе расейскага прэм’ер-міністра Дзьмітрыя Мядзьзведзева, няўзгодненым застаўся 1 плян — пра наднацыянальныя органы.
- Што менавіта зьбіраюцца падпісаць Лукашэнка і Пуцін, а таксама на што пагадзіліся ўрады ў стратэгічных плянах, публічна не агучваецца.
- Тэма «паглыбленьня інтэграцыі» пачалася зь перамоваў пра кампэнсацыю «падатковага манэўру». Але ў «праграме інтэграцыі» няма кампэнсацыі «падатковага манэўру», бюджэт разьлічылі безь яе.
- У канцы 2018 году Мядзьведзеў заявіў, што Расея гатовая «праводзіць адзіную палітыку ў галіне падаткаў, цэна- і тарыфаўтварэньня» толькі тады, калі будуць выкананыя ўмовы пагадненьня аб «саюзнай дзяржаве» 1999 году — а гэта агульныя валюта, суд і мытня.
- Гэтыя ўмовы празвалі «ўльтыматумам Мядзьведзева». Аляксандар Лукашэнка тады адказаў жорстка: маўляў, «шантажаваць марна. Разумею намёкі — уступайце ў склад Расеі. Гэтага ня будзе ніколі».
- 19 сьнежня 2019 году Ўладзімір Пуцін заявіў, што зь Беларусьсю абмяркоўваюць стварэньне наднацыянальных органаў — кантрольнага і эмісійнага. 23 сьнежня Мядзьведзеў паўтарыў, што без наднацыянальных органаў ня будзе кампэнсацыі «падатковага манэўру» і іншай дапамогі Беларусі.
- 17 лістапада Лукашэнка абурыўся тым, што расейцы «кожны раз падсоўваюць новыя ўмовы, у выніку мы ў эканоміцы нешта страчваем», і рытарычна спытаў: «На храна патрэбен такі саюз?».
- Шэраг беларусаў лічаць, што «паглыбленьне інтэграцыі» ўсё ж можа прывесьці да страты незалежнасьці Беларусі. Палітыкі і культурныя дзеячы прынялі 1 сьнежня сумесную заяву «Аб пагрозе Незалежнасьці Беларусі», а 4 сьнежня супраць інтэграцыі выступілі беларускія Telegram-каналы і суполкі «Ўкантакце».
- Акцыі супраць паглыбленьня інтэграцыі Беларусі і Расеі прайшлі ў Менску 7, 8, 20 і 21 сьнежня. А таксама ў Горадні, Пінску, Лідзе. За мяжой — у Польшчы, Украіне, Літве, Чэхіі, Вугоршчыне, Бэльгіі, Ізраілі, ЗША, Канадзе.
-
Агульная сума штрафаў пратэстоўцам — каля 65 тысяч даляраў. Таксама ўдзельнікам акцый прысудзілі агулам 375 сутак арышту.
- 24 сьнежня ў інтэрвію «Эхо Москвы» Лукашэнка заявіў, што акцыі супраць «паглыбленьня інтэграцыі» не былі масавымі («400 чалаек — гэта наша ядро апазыцыі»), і «нехта падказаў, аплаціў, фонды ім даюць прыстойныя грошы». Лукашэнка дадаў, што сам ня пойдзе на тое, «ад чаго яны спрабуюць усьцерагчы беларускі народ», і назваў сябе «галоўны абаронца сувэрэнітэту і незалежнасьці».
Спэцпрапект «Чаму Беларусь не Расея»
